Días de viño e rosas para o Baxi de Ferrol. Logo de fechar o pasado verán un histórico ascenso á máxima categoría, a escuadra galega está completando unha tempada histórica na que actualmente ocupa a oitava posición -que comparte con outro equipo do país, Durán Maquinaria Ensino de Lugo- con nove triunfos, tras esmagar a pasada fin de semana o Araski por 72 a 53.
Ademais, e contra todo prognóstico, logrou unha épica clasificación para a Copa da Raíña, da que disputará os cuartos de final o día 22 de marzo ante o Zaragoza a partir das 20.30 horas.
Para celebrar este gran momento, a directiva do club decidiu aproveitar o partido do próximo sábado, que disputará no Pavillón da Malata ás 19 horas contra o Spar de Girona -cuarto clasificado na Liga-, e organizar unha xornada de festa.
Deste modo, a partir das 13 horas, a afección que se achegue até os exteriores do recinto onde a escuadra ferrolá actúa como local terá ao seu dispor música ao vivo, bocadillos, merchandising e mesmo concursos de tiro, todo para "recadar cartos para costear a viaxe" das xogadoras da canteira para ser parte da Mini Copa da Raíña, que se disputará en Huelva paralelamente á competición sénior.
