Despois do seu exitoso paso polo Ina Delta Rally, en Croacia, onde colleitaron un terceiro posto do ERT RC4 e a sexta posición da clasificación xeral da proba, o calendario de Édgar Vigo e Fátima Ameneiro mudou ao saber da posibilidade de poder estar en Austria e decidir esta pasada fin de semana que tomarían a saída desde ese país.
Nesta competición, o equipo fenés pertencente á Escudaría Scratch Fene volverá atoparse outra vez co piloto checo Rene Donhal, líder do ERT e o seu principal rival, e co búlgaro Nikola Mischev, actualmente, xusto por tras del na clasificación. Nesta ocasión, o número dos pilotos no ERT RC4 volverá ser de oito equipos, polo que a competición terá o máximo coeficiente e os puntos multiplicaranse por tres.
Para Fátima Ameneiro, "Austria é un novo desafío no que sabemos que as cousas non serán fáciles, mais temos que continuar coa mentalidade que estamos a desenvolver nesta tempada e que tan bos resultados está a darnos”. Explica que teñen como primeiro obxectivo “gozar dun novo evento internacional, nun país descoñecido para nós e arrodeados dos pilotos cos que temos que loitar. Imos a por iso!", apunta.
Un bo ritmo
O Rally Weiz decorrerá na rexión de Estiria, nunha pequena localidade que conta con 9.300 habitantes, e puntuará para o FIA ERT, FIA Historic, FIA Rally Academy e tamén para a Opel eléctrica, convertendo a proba austríaca nun grande evento no que serán un total de once as nacionalidades dos diferentes equipos, sendo a parella de Ferrolterra a única representación galega e estatal.
O piloto Édgar Vigo asegura que “o resultado de Croacia demostrounos que temos ritmo e que tiñamos que aproveitar a oportunidade de estar presentes en Austria para poder reengancharnos ao campionato en setembro, con opcións reais a un posto de honra”.
Ese foi o motivo polo que, asegura, “cambiamos este rally polo de Bulgaria, onde a presenza dun número importante de equipos é máis improbábel" e as posibilidades de escalar na clasificación xeral tamén poderán ser maiores.
A competición en Austria desenvolverase en dous días. Comezará na xornada da sexta feira 14 de xullo e rematará na do sábado 15. Os equipos percorrerán 145,3 km cronometrados e 493,56 km totais. Sendo 1,88 km sobre terra e o resto en asfalto.
