Valerón xogará no Rácing de Ferrol. José Alejandro Martín Valerón, nome completo do defensa central coñecido futbolisticamente como Álex Martín, defenderá até finais da presente tempada as cores do Rácing.
O canario chega á Galiza en calidade de cedido desde outro conxunto da Segunda División, o Elxe, onde o compacto defensa de 1,82 metros de altura e aproximadamente 78 quilos de peso nunca chegou a contar coa confianza do seu xa ex adestrador, Sebastián Beccacece, que só lle deu a posibilidade de participar en 317 minutos, repartidos en cinco partidos, o último o afastado 4 de outubro, cando os ilicitanos caeron derrotados por dous a cero ante o Sporting.
No Rácing -que non conta con ningún acordo que facilite o seu traspaso logo da fin do préstamo, ou que impida que xogue ante a escuadra propietaria dos seus dereitos federativos, a coñecida como cláusula do medo- confían en que Martín recupere a versión que exhibiu a pasada tempada no Mirandés, sendo titular en 37 dos 42 partidos de Liga e contribuíndo decisivamente á salvación do conxunto castelán.
As complexas circunstancias do Rácing na parcela defensiva, pois conta coas baixas de David Castro -sancionado- e Clemente -lesionado-, ábrenlle incluso as portas da titularidade a Álex Martín, que esta terza feira completou o seu primeiro adestramento ás ordes de Cristóbal Parralo.
Formado nas categorías inferiores das Palmas, o Betis e o Real Madrid, a pesar da súa xuventude (25 anos) a flamante fichaxe dos Diaños Verdes é todo un trotamundos do fútbol estatal, pois desde a Casa Branca pasou ao Cartaxena -co que ascendeu á Segunda División en 2020- e o Cádiz, con quen chegou a debutar na Primeira División en 2021. Meses despois iniciou unha aventura no filial do Celta circunscrita á tempada 2021/22.