O 2 de febreiro é o Día da Candeloria e o Día Internacional do Ukelele. Dúas efemérides que a Ukestra do Medio uniu para presentar A Candelória, o seu novo single. Un tema alegre de preludio á primavera que é tamén un adianto do seu próximo disco.
Ukebaixo, uke barítono, uke tenor, uke de concerto e uke soprano son os cinco tipos de ukeleles que xunto ao cajón, a pandeireta e as voces conforman a sonoridade deste novo tema dedicado á Candeloria. Unha festa, coñecida tamén como Día das Candeas, que na súa orixe pagá rendía culto á fertilidade. Hoxe a celebración segue viva en toda a Galiza e conta cun nutrido repertorio de refráns populares: “Cando a Candelória chora, medio inverno vai fora; que chore, que deixe de chorar, a metade do inverno está por pasar”.
Día Internacional do Ukelele
Casualmente, o 2 de febreiro de 2011 foi instaurado o Día Internacional do Ukulele por Mike Lynch (Ukulele Mike), profesor e divulgador deste pequeno instrumento creado na década de 1880 en Hawai a partir do cavaquinho portugués. Este día os amantes do ukelele animan a todo o mundo a sacar o instrumento das fundas para celebrar a xornada en calquera espazo.
O single A Candelória foi gravado por Xurxo Pinheiro no Laboratório Soyuz e conta cun vídeo asinado por Coral Piñero. O tema é o primeiro adianto do próximo disco da Ukestra do Medio, un traballo que aínda está en pleno proceso creativo e que a banda de Compostela ten previsto gravar ao longo deste ano 2024.
O vindeiro día 16 de febreiro, a Ukestra do Medio estará tocando en directo no Club Clavicémbalo de Lugo.