O público do SanSan Festival de Benicàssim (Castelló) gozou, na segunda xornada do festival, dos espectáculos de Rozalén, Kase.0 Jazz Magnetism e Tanxugueiras, entre outras artistas, nunha velada na que houbo sorpresas de familiares e homenaxe a Miguel Hernández.
Nun certame que congregou 40.000 persoas en tres días, Tanxugueiras colleron a testemuña da manchega Rozalén no escenario Benicàssim nun espectáculo brillante de luces, coreografías, pandeiretas, electrónica e percusións co que fixeron historia ao achegar ao público festivaliero a súa proposta en galego e de raíz tradicional con cancións que foron desde o máis enérxico a delicadas capelas.
PreParty
Hoxe, o trío galego desprazouse até Madrid para participar, desde as 22 horas da noite na PreParty organizada por Eurovision Spain e na que estarán case unha trintena dos 40 participantes no festival o próximo mes de maio.
"Temos moitísimas gañas de tocar hoxe alí e de volver a ver a todos e todas as eurofans, que tanto nos apoiaron para fechar esta andaina de Eurovisión que tanto nos está a dar", sinalou Aida Tarrío, membro do grupo.
Ademais, xunto con elas estará a gañadora do evento musical en 2016, a ucraína Jamala, unha das persoas que fuxiu do país tras o inicio do conflito bélico.