A xira “Midas” de Tanxugueiras fixo parada na sexta feira na praia de Riazor, dentro da programación do Festival Noroeste da Coruña. “Arica” e “Desidia” comezaban a animar o ambiente entre as perto de 80.000 persoas que acudiran a escoitar o recital de Olaia e Sabela Maneiro e Aída Tarrío.
As pandereteiras conquistaron o público cos seus últimos éxitos, “Pano corado”, “Segadoras”, “Mida” e “Figa”. E non faltou “Terra”, o tema co que participaron no polémico Benidorm Fest. Foi esta canción a elixida para fechar un concerto que se converteu no máis multitudinario dun grupo galego na praia de Riazor.
A Coruña... estamos flipando... GRAZAS por tanto amor e tanto apoio. Nunca imos esquecer esta noite. De verdade... Sen palabras♥️🥺🙏♥️♥️♥️ https://t.co/y7BgmcGspu
— T A N X U G U E I R A S (@tanxugueiras) August 12, 2022
A actuación no areal coruñés chegou tras o baño de masas de Tanxugueiras no auditorio do parque de Castrelos, en Vigo e no Son Rías Baixas de Bueu, onde recolleron o sinxelo de ouro polo tema "Terra". As pandereteiras visitaran a cidade da Coruña apenas cinco meses antes, para ofrecer un concerto na sala Pelícano.
Esta mesma semana, coñecíase que Tanxugueiras conseguiron o número un de vendas en tendas físicas do seu terceiro álbum Diluvio. O disco, publicado o 29 de xullo, situouse como “o máis vendido en tendas físicas na semana do seu lanzamento, quedando por riba de nomes como Beyoncé ou Harry Styles”, informaba os produtores GFK e Promusicae.
A boa acollida do último traballo de Aída Tarrío e das irmás Olaia e Sabela Maneiro evidénciase coas cifras globais de fendas físicas e dixitais, pois Diluvio ocupa a cuarta posición.
Este sábado será a quenda doutros dos pratos fortes do festival: os ingleses UB40 e o galego Baiuca, entre outros.