Ao fío da medianoite, Tanxugueiras estrou o videoclip de Averno, un tema musical que será parte do seu próximo disco e que conta coa participación do rapeiro Rayden, clasificado, como as galegas, para a final do Festival de Benidorm.
A peza audiovisual, dirixida por Trece Amarillo, suma en pouco máis de 12 horas perto de 130.000 reproducións en YouTube. "Un soño" que as pandeireteiras celebran a poucas horas de participar na final do certame que dará a coñecer o nome artístico de quen representará España en Eurovisión.
O novo de Tanxugueiras "nace como unha declaración de intencións a respecto dun sentimento común: a rabia", salientan as pandeireteiras sobre Averno, unha canción que "parte da tradición para outorgar ás sonoridades urbanas un especial protagonismo".
O tema, editado por PlayPlan Cultural e Calaverita Records é un adianto do disco que publicarán en 2022, e que deron a coñecer ao mundo tras a segunda semifinal do Festival de Benidorm.
Co cadro de finalistas completo ─Rigoberta Bandini, Rayden, Xeinn, Gonzalo Hermida, Chanel, Tanxugueiras, Blanca Paloma e Varry Brava─, as galegas prepárase para defender Terra na gala definitiva, a sabendas do apoio do público e das preferencias do xurado que avaliará a calidade vocal e a posta en escena das oitos propostas escollidas pola audiencia mais polo tribunal especializado.
Tradición, identidade e lingua volverán encher o escenario do Festival de Benidorm este sábado a partir das 22 horas.
De fondo cantar, de fondo cantar,
— T A N X U G U E I R A S (@tanxugueiras) January 27, 2022
aí veñen, aí veñen, veñen pra quedar ⚡⚡🖤🖤
📷 @rociocibes #benidormfest #BenidormFest2022 #ElFestivalQueQuieres pic.twitter.com/4GIOxFFHQa