As reaccións ao pase á final das Tanxugueiras: do apoio de Sobral ás críticas ao xurado

A primeira semifinal do Festival de Benidorm non estivo exenta de polémica. A presentadora da gala, Inés Hernand, introduciu ás galegas facendo alusión a que Bélxica participara en Eurovisión con cancións "en idiomas inventados", mais as propias Tanxugueiras replicaron ao remate do evento que o Estado español está "preparado" para participar no certame europeo cunha lingua cooficial.
Actuación das Tanxugueiras en Benidorm (Foto: Rocío Cibes).
photo_camera Actuación das Tanxugueiras en Benidorm (Foto: Rocío Cibes).

As irmás Olaia e Sabela Maneiro e máis Aida Tarrío competirán este sábado na final do Festival de Benidorm —a partir das 22 horas— por obter a única praza que dá acceso a Eurovisión, que este ano se celebra en Torino (Italia) o 14 de maio.

As Tanxugueiras quedaron na segunda posición nunha semifinal que non estivo exenta de polémica desde o primeiro minuto. A actuación do trío de pandeireteiras foi introducida pola presentadora Inés Hernand cunhas controvertidas palabras: "Bélxica enviou unha canción nun idioma inventado non unha, senón dúas veces, en 2003 e 2008".

Porén, a co-presentadora da gala, a veterana cantante Alaska, matizou: "As nosas seguintes candidatas non inventaron nada, ao contrario, o que fixeron foi incorporar á letra da súa canción, 'Terra', as linguas cooficiais que temos no Estado".

No interludio do certame, o artista portugués Salvador Sobral, gañador de Eurovisión en 2017, interpretou o seu tema 'Fui ver meu amor' e, antes de abandonar o escenario, proclamou: "Eu vou coas galegas. Vivan as galegas!".

Polémica co xurado

As galegas obtiveron unha das catro prazas que daban paso á final do Festival de Benidorm coa segunda maior puntuación (93 puntos), só por detrás de Chanel (110).

Mais, malia obteren a puntuación máis alta no 'televoto' —a través de chamadas telefónicas e SMS, 25% do total— e a segunda maior no voto demoscópico —con base nunha enquisa realizada previamente, 25%—, o xurado profesional, composto por Natalia Calderón, Miryam Benedited, Estefanía García, Marvin DietmannFélix Bergsson, relegounas á quinta posición, polo que terían ficado fóra da competición de ser o único voto a valorar —valía 50%—.

A súa decisión desatou unha sonora apupada por parte do público alá presente acompañada dunha ovación ao trío galego, algo que o co-presentador do evento Màxim Huerta tentou acalar con estas palabras: "Se nos gusta a música o que temos que facer é apoiar o noso grupo, ir aos seus concertos e comprar os seus discos. Imos continuar, pois isto só é a proposta do xurado".

Mais estas palabras non sentaron ben no escenario, nin tampouco nas redes sociais, que 'arderon' após coñecer o veredito do xurado profesional.

Tanxugueiras: "O Estado está preparado para levar unha canción nunha lingua cooficial"

Pola súa parte, após actuaren no certame, as Tanxugueiras quixeron enviar unha mensaxe de agradecemento a quen as están a apoiar nesta andaina: "O premio sodes vós, sodes uns cracks auténticos. A xente de a pé é a que escoita música, a que vai aos concertos. Queremos vervos a todas, estamos aquí grazas a vós".

Nunha rolda de prensa na que non puideron evitar as bágoas, dixeron: "O Estado español está preparado para un proxecto inclusivo, diverso e que loite polas linguas cooficiais".

Comentarios