A cidade de Lugo recupera este ano a festa do Arde Lucus que nesta ocasión terá lugar entre o 9 e o 11 de xuño.
Unha extensa programación con máis de 400 actividades e 16 ubicacións diferentes xunto ao feche coa actuación das Tanxugueiras, marcan un evento que ten como previsión superar o índice de asistencia doutras edicións.
O inicio da festa será esta quinta feira coa tradicional entrada das lexións romanas (Ponte Romana, 20.30 horas), visita ás termas e prendido do lume sacro de Vesta que iniciará a “bacanal romana” na Calella do Hospita.
A sexta feira 10 de xuño será o momento dos campamentos e as asociacións volverán a instalalos desde ás 17 horas na Praza Maior e desde as 17.30 horas no parque de Rosalía de Castro, ademais doutras localizacións. Ese día tamén comezarán os bautizos celtas, as vodas celtas e romanas que continuarán até o domingo.
Tamén comezarán as representacións teatrais para todos os públicos que estarán na programación os vindeiros tres días. A xornada rematará coa IV Carreira Nocturna Murus Lucis (Praza Pío XII, 00.00 horas).
O sábado será o momento do desfile do XXI Aniversario, desde a Porta de Santiago até Bispo Odoario (20.30 horas) ademais doutras recreacións históricas como o Asalto ao Monte Medulio das Trebas Galaicas, ás 18.30 horas en Cantiño Nemesio Cobreros.
Pola noite será o momento da experiencia en realidade aumentada en 5D Tempus de Lucus Augusti (22 horas) e do concerto de Saor Patrol (00.30 horas).
O 12 de xuño terá lugar, entre outras actividades, a Cerimonia Unión polo rito celta, dos Mercenarios Galaicos (Horta do Seminario, 16.50 horas) e a fin de festa co concerto das Tanxugueiras ás 21.30 horas na Praza de Santa María.
