O festival Primavera de Jazz de Ourense celebra, a partir desta quinta feira, os seus primeiros vinte e cinco anos con dez concertos de artistas cun gran recoñecemento internacional.
O programa do encontro organizado polo Café Latino comeza na xornada de hoxe coa actuación de Jorge Pardo, que chegará nunha formación de trío, acompañado na guitarra por Melón Jiménez e na percusión por Adri Trujillo.
Outro trío, neste caso o de Abe Rábade, acompañado por Pablo Martín no contrabaixo e o brasileiro Bruno Pedroso na batería, tocará o vindeiro día 24 deste mes.
Tres días máis tarde, o 27, volve un vello coñecido do festival, o mestre flamenco Josemi Carmona, que desta vez acudirá ao Primavera de Jazz acompañado de dúas cantaoras.
Kenny Barron, un dos mellores músicos de bebop en activo, abre o mes de maio, o día 1, cunha proposta de piano a solo.
E o día 3 de maio, será a quenda dunha lenda do jazz actual, o saxofonista Kenny Garrett, que virá desta vez acompañado da artista cubana Melvis Santa, unha das cantantes favoritas de Bebo e Chucho Valdés. O artista de Detroit encheu na edición do ano pasado e é probábel que repita neste 2023.
Aposta canadiana
O pianista Bruce Barth estréase no festival o día 10 de maio cun trío no que o acompañarán o contrabaixista Mark Hodgson e o batería Stephen Keogh. Unha das apostas do festival chegará ao escenario do Café Latino o día 15: o Canadian Jazz Collective, un seteto formado en 2022 polo saxofonista Kirk MacDonald, o trompetista Derrick Gardner, o guitarrista Lorne Lofsky, a clarinetista Virginia MacDonald, o baixista Neil Swainson, o pianista Brian Dickinson e o batería austriaco Bernd Reiter. O primeiro álbum da formación, Septology, recibiu grandes encomios da crítica.
Tres días despois, o 18 de maio, o saxo alto Jesse Davis, un dos "novos leóns" de Nova Orleans, seguidor da tradición iniciada pola familia de Ellis, Wynston e Brandford Marsalis.
O 25 será a quenda do saxofonista Wayne Escoffrery que virá cunha banda formada por David Kikoski ao piano, Ugonna Okegwo ao contrabaixo e Mark Whitfield Jr na batería.
O feche será a cargo do quinteto local liderado por Ton Risco e Alfonso Medela, o 1 de xuño.
