"Ninguén está a salvo": a guerra en Palestina, no foco do Festival de Cine Euroárabe Amal

"Ninguén está a salvo. Todos estamos en perigo, independentemente do lugar do mundo no que naceramos. Enfrontámonos a perigos como o cambio climático, os extremismos ou o capitalismo salvaxe. Antes ou despois, todos seremos vítimas". Así presenta Ghaleb Jabeb Martínez, director da Semana de Cinema Euroárabe Amal, a súa edición de 2023, que comezaba esta segunda feira no Teatro Principal de Compostela cunha charla-coloquio sobre a situación actual entre Palestina e Israel a cargo do codirector do Instituto de Estudos sobre Conflitos e Acción Humanitaria, Jesús Núñez, e a directora adxunta do diario Público, Esther Rebollo. "En realidade, o debate está tan polarizado que o noso obxectivo se circunscribe a tratar de que a xente que estea interesada poida ter información fidedigna. Non é que o mundo árabe sexa mal comprendido, senón que a información que se transmite sobre el está manipulada en función de intereses espurios", declara Ghaleb Jabeb Martínez en conversa con Nós Diario. "Eramos conscientes de que a xente esperaba unha resposta da Semana de Cine Euroárabe -en tanto que entidade que trata de tender pontes entre o mundo árabe e a Galiza-, e o que fixemos foi incorporar este debate a última hora para deitar algo de luz sobre o que está sucedendo en Gaza, sobre a terríbel crise humanitaria que se está a vivir alí e sobre o contexto que dá lugar a estes cíclicos intentos de xenocidio do pobo palestino", explica o director do festival. A Semana do Cinema Euroárabe comeza cunha palestra sobre Israel e Palestina Contra a desinformación “A guerra en Palestina non empezou o 7 de outubro”, sostén Jesús Núñez. O economista explicou que desde hai anos Israel converteu Gaza na “maior prisión do planeta ao aire libre”, desatendendo as súas obrigas como potencia ocupante e castigando a poboación alí encerrada en contra do dereito internacional. Igualmente, sostivo que Hamás e o resto dos grupos implicados na “condenábel operación realizada en territorio de Israel”, cometeron unha violación do dereito internacional. “A súa acción non axuda en absoluto á causa palestina e só realimenta un ciclo de acción e reacción violenta que non vai servir para mellorar o nivel de benestar e seguridade da poboación palestina". "A manipulación atenta contra o dereito da cidadanía á información", reitera Jaber Martínez, "e a conculcación dese dereito debería preocuparnos a todos". Amal pretende ser unha fiestra aberta ao entendemento e un foro no que se fornezan ferramentas para entender conflitos cuxo tratamento na prensa occidental adoita distar moito da imparcialidade e a obxectividade. Diversidade do cine árabe O programa desta edición de Amal quere reflectir a diversidade existente nunha cinematografía pouco coñecida nestas latitudes, malia que exista unha produción audiovisual moi numerosa con polos como Exipto ou Turquía que posúen un tecido industrial moi desenvolvido. "Dentro do que se chama cine árabe hai miles de culturas e de historias", resume Gaber Martínez. "Mais se hai algo que teñen en común é que en xeral, están moi achegadas á sociedade. Mostran unhas colectividades que aspiran ao progreso material, mais sen renunciar á súa cultura. Como noutras partes do mundo, deberiamos ser conscientes de que o feito de que abran un Starbucks na túa rúa non é un sinal de desenvolvemento, senón un síntoma de colonización". Ghaleb Jaber, palestino asentado na Galiza: "Existía información de que Israel ía bombardear Gaza antes do ataque do sábado" As proxeccións comezan esta terza feira con Conspiración no Cairo (2022), do director sueco de orixe exipcia Tarik Saleh, unha longametraxe de ficción na que un estudante da universidade Al-Azhar de Exipto, centro de poder do Islam suní, acaba convertido nun peón das loitas de poder entre as elites relixiosas e políticas. Na cuarta feira será a quenda de Entre as figueiras (2022), da directora francotunesina Erige Sehiri, unha historia que se desenvolve no rural de Tunisia, onde conviven distintas xeracións divididas pola revolución de 2011. Na quinta feira, Amal proxectará The Sage (2021), de Basil Alkhatib, que revisa as feridas abertas pola guerra na sociedade siria a través da figura dun un vello médico que vive nunha desolada cidade da que a maioría de habitantes fuxiu. O 27 de outubro, o público poderá ver o documental Little Palestine, Diary of a Siege (2021), do cineasta siriopalestino Abdallah Al-Khatib. O filme mostra a vida dos habitantes do distrito de Yarmouk, en Damasco, que acolleu o campo de refuxiados palestinos máis grande do mundo. Cando estalou a revolución siria, houbo intensos enfrontamentos entre o exército sirio e os rebeldes, xunto cos seus respectivos aliados palestinos. Finalmente, o sábado, proxectarase O caftán azul (2022), da directora marroquí Maryam Touzani. A cineasta enfronta, no filme, a homosexualidade en Marrocos, unha cuestión xuridicamente ilegal e aínda moi sensíbel nun país onde conviven modernidade e tradición. A vangarda audivisual cítase en Curtocircuíto A cultura gastronómica árabe, a carón do cinema En paralelo á celebración do festival Amal, o restaurante Caney ofrece un menú de gastronomía árabe. Trátase dunha proposta que engloba pratos tradicionais das cociñas de Palestina, Xordania, Líbano, Exipto, Turquía ou Marrocos. Os amantes da gastronomía árabe e aquelas persoas interesadas en descubrir os seus pratos poden achegarse até o sábado, ao restaurante do Ensanche para probar un menú árabe, no que se presentan oito entrantes ou mezzes variados, e unha proposta de segundos pratos e dúas sobremesas, que se poderán degustar de forma individual, sen necesidade de pedir un menú completo. Cociña diversa A semana de cociña árabe permitirá probar entrantes típicos da cociña árabe como a harira, sopa tradicional do Magreb de carne, legumes, verduras e pasta con gornición de dátiles, ou o warak dawali, un prato de orixe otomá preparado con arroz, cebola, herbas, especias e carne picada; pratos como o mansaf, unha especialidade beduina considerado o prato nacional da cociña xordana, que consiste nun guiso de cordeiro sazonado con herbas aromáticas, cociñado lentamente nun caldo de Jameed (queixo curado de iogur) e arroz basmati; ou sobremesas como a kinafa, unha torta de queixo, con pasta kataif e pistacho.