xoves 16/09/21

Os traballadores de Siemens Gamesa nas Somozas aproban por unanimidade o ERE extintivo

A pesar desta aceptación, a representación sindical, que corresponde a UXT e CC.OO., rexeitou este procedemento, por estimar que se trata dun "proceso de deslocalización de libro"

Asemblea de traballadores de Siemens Gamesa nas Somozas. (Foto: EP).
Asemblea de traballadores de Siemens Gamesa nas Somozas. (Foto: EP).

Os traballadores da planta que a multinacional Siemens Gamesa ten nas Somozas (A Coruña) aprobaron, en asemblea e por unanimidade dos presentes, o acordo ao que chegou dirección e representantes sindicais para aplicar un ERE extintivo e con iso o fechamento das instalacións dedicadas á fabricación de pas para aeroxerador.

A asemblea, desenvolvida no interior dunha nave propiedade do Concello das Somozas, contou cunha participación de 170 operarios dun censo de 214, votando todos eles a favor, é dicir 100%. Non se rexistrou ningún voto en contra, nin en branco nin nulo.

A pesar desta aceptación, a representación sindical, que corresponde a UXT e CC.OO., rexeitou este procedemento, ao estimar que se trata dun "proceso de deslocalización de libro". Ao mesmo tempo, criticaron "a actual lexislación laboral" que lles deixa "atados de mans e permite que actitudes e decisións como a que tomou Siemens Gamesa póidanse efectivizar".

Así mesmo, os representantes tamén criticaron o papel das administracións, ao estimar que "non se quixeron involucrar a fondo e miraron para outro lado", despois de que tanto o comité de empresa como federacións de industria reclamasen repetidamente a convocatoria dunha mesa con representantes do Goberno.

Condicións do acordo

En canto ás condicións ás que chegaron os representantes sindicais coa dirección de Siemens Gamesa, o acordo estabelece como data para o cesamento da actividade o 31 de marzo deste ano, cunha indemnización media de 63 días por ano traballado sen límite de mensualidades, cunha indemnización mínima asegurada de 30.000 euros para cada operario, un caso que afecta aos que levan menos anos na empresa.

Tamén se acordou un plan de prexubilacións desde os 55 e até os 63 anos co 70% do salario regulador até 80%. Paralelamente, presentouse un plan de recolocacións internas de até 155 postos de traballo, dos que 104 serán vacantes en Portugal, onde existe unha planta que está a 300 quilómetros das Somozas. Estes empregados terán alí un período de catro meses de proba, tempo no que poderán decidir acollerse ao ERE no caso de que así o desexen.

En caso de trasladarse á planta de Vagos, contarán co mesmo salario durante catro meses e, a partir desa data, terán o salario coas condicións de Portugal, máis baixo que o das Somozas, ademais dunha indemnización por traslado duns 8.500 euros, pagando a empresa o aloxamento durante catro meses para o traballador, así como familiares ao seu cargo e a mudanza.

O acordo tamén recolle a contratación dunha empresa externa co obxectivo de buscar unha solución industrial, ofrecendo alternativas de empregabilidade aos traballadores afectados polo despedimento colectivo. Crearase unha comisión de seguimento do ERE na que estarán empresa e sindicatos asinantes, na que se establece un plan de recolocación externa durante 12 meses para o 75% dos afectados. En caso de non conseguir ese obxectivo, e que non sexa por responsabilidade do traballador, ampliarase o prazo até conseguilo.

comentarios