Traballadoras do servizo de limpeza de edificios e locais da circunscrición de Lugo, en folga desde o 16 de outubro, fecháronse esta quinta feira en sinal de protesta nas instalacións da Xunta da Galiza na capital galega para exixir á Administración que tome cartas no asunto e para denunciar a proposta "completamente insuficiente" recibida de parte da patronal na tarde da cuarta feira.
O acto de protesta, no que tomaron parte decenas de profesionais xunto á representante de CIG-Servizos en Lugo, Asunción Castiñeira, e o secretario xeral da Confederación Intersindical Galega, Paulo Carril, comezou ás 11 horas e prolongouse durante toda a mañá.
"Fechámonos aquí no edificio da Xunta, despois de 102 días de folga, porque a Xunta é o principal cliente destas empresas de limpeza", explicou Asunción Castiñeira, para acto seguido puntualizar que as administracións deben tomar "dunha maneira clara cartas no asunto" para lograr unha solución a un conflito que "se está prolongando demasiado".
💪🧹Traballadoras da limpeza e representantes da CIG acaban de iniciar un peche no edificio administrativo da Xunta de Galiza en #Lugo para reclamar a intervención activa da administración no conflito. Despois de máis de tres meses en folga, a patronal segue negándose a pór… pic.twitter.com/N8UwK4rEG3
— CIG (@galizaCIG) January 25, 2024
"As traballadoras xa levan 102 días en folga e a Xunta non pode seguir mirando para outro lado", asevera Castiñeira. Critica que as administracións consintan que as grandes empresas e grupos empresariais (FCC, Eulen, Clece, Acciona, etc.) se fagan con millonarios contratos públicos no sector mentres explotan as traballadoras e as manteñen nunhas condicións salariais de miseria.
O feche tivo lugar tan só un día despois de que na tarde da cuarta feira a patronal remitira á representación do persoal unha proposta escrita (a primeira formulada desta maneira desde o inicio do paro indefinido do sector) para tratar de achegar posturas cos sindicatos.
Unha proposta "completamente insuficiente", denuncia a CIG, porque "non contempla cláusula de revisión", unha demanda que, sostén o sindicato, "permite garantir que non volva ocorrer unha situación como esta".
Unha "proposta insuficiente"
Tras 102 días en folga e cun convenio colectivo caducado en decembro de 2021, os sindicatos consideran que a proposta trasladada pola patronal supón "un comezo" na negociación pero resulta "insuficiente" e "chega tarde".
"O único avance é que sacan de enriba da mesa estabelecer o valor fixo do trienio e que os incrementos vaian a plusconvenio e non a toda a táboa salarial", indica Asunción Castiñeira, que responsabiliza a patronal Aspel de actuar con "mala fe" aínda sendo perfectamente consciente de "o que supón para as traballadoras o atraso na negociación".
"Hai un avance porque unha serie de recortes que se puxeron enriba da mesa retiráronse, pero non contempla algo que para nós é imprescindíbel, que é a cláusula de revisión", profundou, respecto da proposta recibida, a representante de CIG-Servizos.
A proposta de Aspel, que non alcanza, sosteñen desde a CIG, "para desconvocar a folga", será sometida a debate esta sexta feira na Asemblea do sector, catro día antes da celebración, a terza feura 30 de xaneiro, dunha reunión entre patronal e sindicatos.
