Os sindicatos piden medidas que reduzan as xornadas laborais sen baixar soldos

As empresas industriais de até 250 traballadores e traballadoras que reduzan a semana laboral a catro días sen recortar o salario poderán recibir axudas do Goberno estatal para a mellora da produtividade, segundo a resolución da fundación Escola de Organización Industrial (EOI), publicada esta quinta feira no Boletín Oficial do Estado (BOE). Recuperar a xornada de 35 horas, un dereito aínda pendente para o persoal de enfermaría do Sergas As pequenas e medianas empresas (pemes) do sector industrial teñen un mes para presentar as solicitudes, coas que poderán optar a axudas de até 200.000 euros. Para iso, deberán ter personalidade xurídica propia, estar constituídas no Estado español e debidamente inscritas no rexistro correspondente. Ademais, fican excluídas as do sector público. Pemes industriais poden optar a axudas para reducir xornadas A dotación orzamentaria asignada a esta convocatoria é de 9,650 millóns de euros, e o gasto realizarase con cargo ao orzamento da fundación EOI. O financiamento que se concederá en forma de subvención será, como máximo, de 90% sobre o orzamento presentado, en función do número de traballadores e traballadoras. As empresas de até 10 persoas empregadas poderán conseguir 90% do gasto de persoal soportado pola empresa como consecuencia da redución da xornada durante o primeiro ano. Aquelas con entre 11 e 52 persoas poderán acceder a unha subvención asignada de 80% do gasto de persoal soportado como consecuencia da redución da xornada no primeiro exercicio. Para aquelas con máis de 53 e menos de 249, a subvención asignada será de 75%. As bases da convocatoria publicada no BOE estabelecen que as axudas serán para pequenas e medianas empresas (pemes) industriais que recorten polo menos 10% da xornada en cómputo semanal. Ademais, ditas reducións afectarán unicamente a persoas traballadoras con contrato indefinido a tempo completo. Reaccións sindicais O secretario confederal de Negociación Colectiva, Emprego e Industria da CIG, Francisco Sío, en declaracións a Nós Diario, opina que evolucionar cara a unha xornada de 32 horas "é algo positivo", posto que "o futuro do mundo laboral vai camiño de que se traballen menos horas para que se repartan os postos de emprego". Ao respecto, afirma, "a xornada laboral na Galiza e no Estado español está entre unhas 200 e 300 horas máis ao ano que en Estados como Alemaña, e así é imposíbel que cunha mesma taxa de actividade teñamos os mesmos postos de traballo". A CIG convoca unha manifestación para esta quinta feira en Lugo para reclamar "salarios e convenios dignos" Para Sío, reducir a xornada laboral, "é algo fundamental para poder baixar o desemprego e estar en igualdade de condicións co resto de empresas doutros Estados". Porén, o representante da CIG é "escéptico" sobre a posibilidade de que este tipo de medidas se poidan pór en marcha na Galiza. "O que vexo no sector industrial é que cada vez se aumentan máis as horas de traballo e que cada vez costa máis na negociación colectiva reducir as xornadas", afirma o sindicalista. Pola súa parte, Maica Bouza, secretaría de Emprego de CCOO, en conversa con Nós Diario, sinala que "está a favor das xornadas de catro días sempre e cando se garanta a redución de horas de traballo, mais non compartimos outros proxectos que se están implantando para concentrar o mesmo tempo de traballo en menos días". Neste sentido, sobre a iniciativa aprobada polo Goberno do Estado español, explica que "é unha iniciativa adecuada". Seguimento "masivo" da folga de autobuses convocada por CIG, CCOO e UXT: "As empresas rin dos traballadores" "Os traballadores e as traballadoras precisan tempo para a súa vida persoal e cantas máis facilidades haxa para desenvolver o teu proxecto de vida dentro da empresa máis vencellados se sentirán a ela, e os estudos así o demostran", engade Bouza, que apunta ao exemplo doutros Estados "onde se fixeron este tipo de proxectos e mellorou moito a produtividade das empresas". Javier Carreiro, secretario xeral da federación de Industria de UXT, engade a Nós Diario que "cando se avanza, temos que avanzar en todo, estamos falando de intelixencia artificial, da robótica e da dixitalización, cousas que nos teñen que facilitar a vida familiar e laboral a todo o mundo". En consecuencia, di Carreiro, "é posíbel realizar a redución de xornada, igual que no seu tempo foi posíbel a diminución a 40 horas, e as Administracións teñen que pór as medidas correctas para que se poida levar a cabo". Condicións das axudas Segundo a Orde do Goberno estatal, o número de traballadores e traballadoras participantes no proxecto piloto deberá afectar como mínimo 30% do persoal en empresas de até 20 persoas empregadas e polo menos a 25% nas pemes con entre 21 e 249 persoas contratadas. Para o cálculo do número de persoas traballadoras dunha empresa ou centro de traballo, terase en conta o persoal total da mesma. Para estes efectos, computará todo o persoal da empresa, calquera que sexa a súa modalidade de contrato, incluídas as persoas con contratos fixos-descontinuos ou con contratos de duración determinada. Ademais, as pemes deberán garantir que o número de mulleres participantes no proxecto responda á porcentaxe de distribución de xénero existente na totalidade do persoal con contrato indefinido a tempo completo, permitíndose unha desviación de 10%. Con todo, na Orde ministerial precísase que esta porcentaxe de mulleres participantes poderá ser superior, mais non inferior. Unha vez que as empresas impulsen estes proxectos piloto, prevense axudas directas de maneira temporal polos custos asumidos pola empresa como consecuencia da redución da xornada, así como polos custos de implementación de novas fórmulas organizativas e de formación que, a medio prazo, incrementen a produtividade. A xornada de 32 horas é realidade en sectores doutros Estados Francisco Sío (CIG) Francisco Sío entende que "se o empresariado tivera vontade poderíase avanzar de cara ás reducións de xornada, mais non é asi, sobre todo no sector da industria". Segundo o representante da CIG, "recortar o tempo de traballo é viábel e provocaría que as empresas fosen máis produtivas, pois tamén eliminaría o efecto da fatiga e do cansazo". Ante a falta de iniciativa empresarial neste sentido, Sío "cre que ten que ser a Administración a que intente mostrar estas experiencias como positivas". Maica Bouza (CCOO) Maica Bouza explica que "hai que ver como funcionan estes proxectos pilotos" mais entende que as reducións de xornada "son viábeis para as empresas de maior tamaño e que no caso das máis pequenas habería que darlles axuda para poder iniciar o camiño". Sobre os salarios, Bouza aclara que "a redución de tempo de traballo non pode implicar unha caída dos salarios senón un aumento da produtividade, pois senón do que estariamos falando é dun simple axuste de xornada". Javier Carreiro (UXT) Javier Carreiro explica que a diminución da xornada laboral a 32 horas "é unha medida moi positiva". Para o representante de UXT, "trátase dunha medida viábel, pois está demostrado que se pode manter a mesma produción". Co que non estariamos de acordo, sinala, "é con que se realice coa correspondente rebaixa salarial, tería que ser nas mesmas condicións". Carreiro insiste en que a redución é posíbel, xa que "seriamos moito máis competitivos e máis produtivos que agora".