Os sindicatos lamentan as "insuficiencias" na reforma dos subsidios do paro: "Man de obra barata para as empresas"

As centrais sindicais fixeron unha análise crítica da reforma dos subsidios por desemprego aprobada esta semana polo Executivo estatal. Ao respecto, a CIG afirmou esta sexta feira que as medidas do decreto "dificultan o acceso a unha prestación, reducen as contías e a súa duración e aumentan a capacidade das empresas de transferir ao sector público os custos sociais da situación de empobrecemento e precariedade xeneralizada pola extensión dos baixos salarios e da contratación parcial e fixa descontinua". Pola súa parte, o secretario xeral de CCOO, Unai Sordo, sinalou que a reforma do subsidio por desemprego deseñada polo Goberno español, "que non contou co acordo dos axentes sociais, implica melloras no tratamento das axudas, mais contén tamén algunhas insuficiencias". No caso de UXT, a secretaria confederal, Patricia Ruíz, lamentou que o decreto "non contemple un compromiso maior á hora de reducir a fenda salarial" e, sobre todo, "a falta dunha reforma en profundidade dos servizos públicos de emprego". A CIG propón que as prestacións e os subsidios por desemprego nunca sexan menores ao salario mínimo Neste sentido, a CIG denunciou que a reforma afonda na privatización dos servizos públicos de emprego, xa que "as axencias privadas de colocación realizarán labores de intermediación laboral ao mesmo nivel, intensidade e capacidade que a Axencia Estatal de Emprego (SEPE)". Ademais, explicou a central sindical nacionalista, as persoas traballadoras beneficiarias de prestacións por desemprego "estarán obrigadas a participar nas actividades e programas que realicen estas axencias privadas". Sobre esta cuestión, Sordo indicou que a política de protección (os subsidios e as prestacións do paro) "non debe confundirse coas políticas de emprego destinadas a facilitar que os desempregados, a través de procesos de formación e de orientación laboral, atopen un emprego", políticas estas últimas que, para o secretario xeral de CCOO, son "manifestamente mellorábeis" no Estado español. Modalidades de subsidio O decreto-lei reforma o nivel asistencial da protección por desemprego, simplificando as modalidades de subsidio por situación de paro, que se reducen a dous supostos: o subsidio por esgotamento e o subsidio por cotizacións insuficientes. Consérvase, ademais, o subsidio de 480 euros a maiores de 52 anos. Cales son as claves da reforma do subsidio por desemprego que aprobou o Executivo estatal? Porén, destacou a CIG, "é importante ter en conta que estas medidas non entrarán en vigor até o mes de xuño de 2024, de maneira que as axudas que se soliciten até esa data estarán reguladas pola norma anterior en canto a requisitos, importes e persoas beneficiarias". Patricia Ruíz, secretaria confederal de UXT: "O decreto aprobado adoece dunha reforma en profundidade dos servizos públicos de emprego" "Non se modifica o criterio de rendas", criticou o sindicato nacionalista, "para o acceso ao subsidio, exíxese non ter ingresos superiores a 75% do salario mínimo de forma individual". Ademais, explicou, para acreditar cargas familiares "é necesario non superar esa mesma cantidade sumando os ingresos de todas as persoas que compoñan a unidade familiar e dependan economicamente do solicitante e dividindo polo número de membros, como até o de agora". Os tres sindicatos coinciden sobre o difícil acceso ao subsidio por paro en menores de 45 A reforma dá dereito ao subsidio por desemprego ás persoas menores de 45 anos sen responsabilidades familiares, que até o de agora estaban excluídas, sempre que cumpran o requisito de ingresos. Porén, sinalou a CIG, "as súas condicións de acceso ao subsidio son máis duras, para un subsidio de seis meses de duración teñen que ter esgotada unha prestación de 360 días ou máis, cando aos maiores de 45 anos só lles piden 120 días". CCOO e UXT din que hai que mellorar a situación no emprego parcial Unha critica que compartiron CCOO e UXT, "isto exixe tres anos de cotización, o que pode resultar excesivo en moitos casos". Así mesmo, ambos os sindicatos botaron en falta a eliminación da percepción parcial do subsidio cando se procede dun emprego a tempo parcial. "Unha situación que afecta os subsidios actuais máis feminizados", afirmaron as dúas organizacións. Cando entrarán en vigor os novos subsidios por desemprego? As prestacións por desemprego (contributiva e subsidio) serán compatíbeis coas bolsas e axudas que se obteñan por asistencia a accións de formación profesional ou no traballo ou para realizar prácticas formativas ou prácticas académicas externas en entidades públicas ou privadas. Polo tanto, sinalou a CIG, "apróbase unha nova medida regresiva que significa subministrar man de obra barata ás empresas, que conseguen gratuitamente transferir ao sector público a pobreza laboral que causan as permanentes reformas laborais e o fomento dunha menor protección social". Imposición de Bruxelas A CIG criticou que a reforma fose "imposta" pola Unión Europea (UE) para acceder aos fondos Next Generation, “que están a hipotecar o noso futuro xa que se condicionan a executar medidas, baixo a forma de reformas, que constitúen un auténtico plan de axuste, recortes de dereitos que se suman aos aprobados polo PP e que seguen vixentes porque o actual Goberno español non os derrogou”. A CIG critica a regulación do permiso por teren crianzas Sobre o permiso parental, a CIG criticou que no decreto aprobado polo Executivo estatal "non se aproveite para regular o seu carácter remunerado, que é un aspecto pendente de transposición". O sindicato nacionalista explicou que se trata dunha cuestión "de obrigado cumprimento" a raíz da directiva 2019/1158 da UE, mais que se está a cumprir de maneira "secuenciada". O carácter remunerado do permiso parental, ben sexa mediante salario ou a través dunha prestación pública, consonte o artigo 8 da directiva, deberá ser obxecto de transposición antes do 2 de agosto de 2024, que é cando finaliza o prazo para a transposición que dá a propia normativa da UE. Permiso de lactación Ademais, a central sindical sinalou que o permiso de lactación non pasa a ser de 28 días. "A pesar da propaganda, o único cambio que se introduce neste decreto-lei consiste na eliminación da alusión 'nos termos que se estabeleza na negociación colectiva ou acordo ao que se chegue coa empresa', mais sen ficar estabelecido o número de días no caso do goce acumulado ou a posibilidade de gozar do permiso no caso de ter a suspensión do contrato por nacemento a tempo parcial ou de interrompelo e gozalo por períodos semanais".