Traballadores de Vitrasa, a concesionaria municipal do transporte urbano do Concello de Vigo, acordaron esta sexta feira en asemblea aceptar a oferta da compañía e suspender temporalmente a folga indefinida, que comezou a finais do mes de novembro, para negociar coa empresa.
En concreto, despois de que o comité convocara os empregados e as empregadas para votar sobre os seguintes pasos a seguir no conflito, a maioría do persoal optou por aceptar o trato proposto por Vitrasa, con 158 papeletas.
Pola súa banda, só 23 persoas preferirían continuar a folga e 32 empregados votaron a opción de volver aos paros parciais, como levaron a cabo durante os tres últimos anos. Ademais, dúas persoas votaron en branco e tres indicaron que pararían a folga a cambio de nada.
Tal como informou o presidente do comité, Imanol Arnoso, as propostas de Vitrasa supuñan un aumento dos salarios do 2% no ano 2021 de forma consolidada, ou un aumento do 3% en 2023. Agora será o comité quen elixa unha destas opcións e seguirá negociando. A folga, segundo dixo, desconvocarase a partir da semana que vén.
O persoal de Vitrasa leva anos protestando pola situación laboral que vive, debido a que o convenio colectivo caducou hai xa tres anos, mantendo os salarios conxelados desde esa data, pese ao incremento do prezo da vida tras a pandemia e da propia subida dos billetes de bus.
Nas últimas semanas intensificáronse as reunións de mediación entre o comité e a Dirección da concesionaria, sen que se alcanzara ningún acordo para desbloquear a situación. Agora, parece que o persoal decidiu aceptar as propostas da compañía e suspender a folga.
