Un operario dunha empresa auxiliar de Repsol morreu esta mañá nun accidente laboral na refinaría da Coruña mentres realizaba traballos nas instalacións da factoría.
A pesar da intervención dos servizos médicos, "non foi posíbel evitar o seu falecemento", engade a compañía, que ademais, "en nome dos seus traballadores, transmite o seu pesar ás familias do falecido e á empresa na que traballaba".
Tanto Repsol como a Policía Xudicial manteñen aberta unha investigación para esclarecer as causas do accidente.
Condicións de traballo seguras
Tras coñecer o ocorrido, a vicepresidenta segunda do Goberno de España e ministra de Traballo, Yolanda Díaz, lamentou esta "terríbel noticia" e enviou o seu "agarimo" á familia e achegados do falecido. "A empresa debe garantir sempre unhas condicións de traballo seguras e débese esclarecer canto antes o ocorrido", engadiu, a través de Twitter.
Tamén a alcaldesa da Coruña, Inés Rey, mostrou o seu "apoio e condolencias" á familia do operario e dixo estar "a disposición" da dirección da empresa "para o que precisen".
Segunda morte no que vai de ano
Trátase do segundo sinistro laboral que ten lugar na refinaría de Repsol na Coruña no que vai de ano.
O primeiro sinistro, no mes de marzo, resultado dun escape de gas durante unha parada técnica, acabou con dous traballadores no hospital e o falecemento dun deles ao non poder superar as feridas.
A morte de Unai Martínez desencadenou as protestas dos traballadores das contratas da refinaría, que exixían máis seguridade a Repsol.