Correos xa formalizou 19.400 contratacións de reforzo para o desenvolvemento das actividades relacionadas co voto por correo para as eleccións estatais que terán lugar o próximo 23 de xullo.
Ademais, a empresa pública afirmou que seguirá contratando a todos os efectivos que sexan necesarios para garantir o correcto funcionamento do voto por correo nas eleccións, polo que espera que a cifra siga aumentando.
Correos levou a cabo estas contratacións de reforzo tendo en conta o incremento no número de solicitudes de voto por correo recibidas, e a coincidencia do período electoral coas vacacións de verán, de modo que tamén cubriu 100% as vacacións do persoal durante o mes de xullo.
Neste sentido, máis de 30% dos empregados que tiñan previstas as súas vacacións neste mes solicitaron voluntariamente atrasalas para estar dispoñíbeis durante a campaña, o que indica, en opinión da empresa, "o alto nivel de compromiso do persoal de Correos co servizo público".
A empresa tamén realizou extensións de horarios en 274 oficinas, especialmente nas zonas onde se prevé maior afluencia, como nas áreas turísticas, unha medida que se poderá ampliar a máis oficinas nos próximos días, en función das necesidades. Tamén se contemplan aperturas extraordinarias en días non laborábeis como sábados e festivos.
A apertura será exclusivamente para atender as necesidades dos cidadáns relacionadas co proceso electoral (entrega de documentación electoral avisada e admisión de voto por correo). Estas extensións horarias e aperturas extraordinarias poderán ampliarse en función de como vaia evolucionando o proceso do voto por correo nas próximas xornadas.
Centros loxísticos
Tamén está previsto realizar reparticións en fin de semana. En concreto, o vindeiro sábado, 15 de xullo, realizarase unha repartición extraordinaria en todo o Estado.
Esta repartición extraordinaria completa o realizado o pasado sábado, 8 de xullo, en 586 unidades de distribución de todo o Estado, no que traballaron 3.033 empregados de Correos entregando documentación electoral.
Tamén se adaptarán os roteiros de transporte para a remisión da documentación desde o centro loxístico a todas as unidades de distribución, en función das necesidades.
