Traballadoras mobilízanse na Coruña, Vigo, Ourense, Lugo e Compostela contra os horarios impostos por Inditex

As empregadas despregaron faixas denunciando a vulneración dos seus dereitos laborais diante de tendas de Zara, Bershka e Stradivarius, todas pertencentes ao xigante téxtil. 
Concentración diante dun Zara no centro de Vigo esta sexta feira (CIG).
photo_camera Concentración diante dun Zara no centro de Vigo esta sexta feira (CIG).

Traballadoras do grupo téxtil Inditex concentráronse esta sexta feira ás portas de varios estabelecementos da Coruña, Vigo, Ourense, Lugo e Compostela para rexeitar a modificación de horarios imposta pola dirección.

A medida, que xa foi denunciada pola CIG diante da Inspección de Traballo, afecta tamén ao persoal con concreción horaria para o coidado de crianzas, o que imposibilita a conciliación da vida laboral e familiar.

As mobilizacións tiveron lugar entre as 12 e as 12:30 horas esta mañá, diante de tendas de Zara, Bershka e Stradivarius, onde as empregadas despregaron faixas denunciando a vulneración dos seus dereitos laborais e berraron consignas contra a decisión da empresa de modificar a súa xornada de traballo.

Foi a primeira das accións que fan parte da campaña de protestas convocada pola CIG despois de que a compañía se negase a retirar a medida e que terá continuidade nos vindeiros días.

Sen constancia por escrito

A secretaria nacional da CIG-Servizos, Transi Fernández, que participou na concentración de Vigo, explicou que a pesar de que xa se celebraron varias xuntanzas coa empresa o cambio de horarios continúa, xa que a dirección négase a dar marcha atrás na súa decisión.

A reprensentante da CIG lembrou que Inditex modificou o día 18, de maneira unilateral e dun día para outro, os horarios do persoal de tendas en todo o Estado, decisión que incluíu tamén ás traballadoras que teñen redución de xornada por coidado de crianzas.

"Fíxoo", salienta Fernández, "sen especificar canto tempo ía durar a medida e coidándose moito de non deixar constancia por escrito para dificultar que as afectadas poidan reclamar".

En consecuencia, o persoal do grupo propiedade de Amancio Ortega "queda sen días libres, límite de tardes e librada de fin de semana, e nin sequera poderán gozar en moitos casos do descanso semanal mínimo que estabelece a lei". 

Comentarios