Galiza fechou o mes de novembro con 205.205 persoas rexistradas no Réxime Especial de Autónomos (RETA). A cifra representa 1.298 traballadores e traballadoras por conta propia menos que hai un ano, cando declaraba 205.503 persoas inscritas neste réxime da Seguridade Social. A nova caída do emprego autónomo concentrouse, especialmente, no sector do comercio retallista, con 900 persoas menos ocupadas, destacando a destrución de postos de traballo no téxtil e no calzado.
Precisamente, o comercio suma 22% do total dos traballadores e traballadoras por conta propia da Galiza, unha cifra semellante á media estatal, onde significa 22,6%. A baixada nas afiliacións do RETA faise efectiva após perder 1.758 cotizantes na anterior anualidade. Mentres a comezos de xaneiro de 2022, o RETA rexistraba 207.983 persoas, esta cifra reducíase a 206.225 a 31 de decembro, marcando un descenso de 0,4%. A caída das traballadoras e traballadores por conta propia superou na Galiza por un punto a media estatal, destruíndose en termos absolutos 1.693 empregos máis na Galiza que no conxunto do Estado español.
A tendencia do exercicio de 2023 sitúase na liña comezada en 2009. Se á volta de xaneiro dese ano Galiza dispuña de 232.112 persoas ocupadas por conta propia, 14 anos despois reducíronse a 205.205, perdéndose nese período 27.007 empregos.
Ademais, diversos estudos apuntan a unha ampla bolsa de falsos autónomos na Galiza, cifrándoa a profesora da Universidade Carlos III de Madrid Raquel Carrasco e a súa compañeira da Universidade de Alcalá Virginia Hernanz en “30% do total de autoemprego na Galiza”.
Un comportamento diferente
O comportamento do emprego autónomo na Galiza contrasta co do resto do Estado. Neste caso, os traballadores e traballadoras por conta propia medraron en 14.535 persoas no último exercicio, pasando de 3.329.349 en novembro de 2022 a 3.343.702 no mesmo mes deste ano. A tendencia estatal, tamén, é diferente á galega para as estas últimas 14 anualidades. Así, o número de autónomos e autónomas incrementouse de 2009 a 2023 en 173.346 persoas, presentando Madrid e Euskadi os mellores rexistros neste ámbito.
