A Confederación Intersindical Galega (CIG) ten convocadas para a próxima quinta feira, 1 de xuño, asembleas de delegadas e delegados así como mobilizacións nas sete cidades galegas e mais Ribeira en rexeitamento ao V Acordo polo Emprego e a Negociación Colectiva, asinado por CCOO, UXT, CEOE e Cepyme, o pasado 10 de maio.
“Un mal acordo polos seus contidos, polas súas renuncias e porque fai concesións a reivindicacións históricas da patronal”, segundo sinalan desde a CIG.
O V Acordo para o Emprego e a Negociación Colectiva (AENC) asinado polas patronais CEOE e Cepyme cos sindicatos CCOO e UXT constitúe, de acordo coa central sindical, “un novo capítulo do diálogo social, neste ocasión bipartito, dentro do proceso permanente de pacto social, estatalización e centralización da negociación colectiva en Madrid”.
Desde as primeiras liñas do Acordo faise “unha aposta polo diálogo social, unha posta en valor e autoxustificación, entendíbel por parte de CEOE-Cepyme” pero “lamentabelmente asumida e defendida por CCOO e UXT”. Para a CIG, estamos ante a confirmación do “entreguismo sindical a reivindicacións históricas da patronal e a axenda dos Gobernos en cumprimento do plano de axuste que a política neoliberal da UE vén exixindo aos Estados, nomeadamente ao español, para acceder aos fondos europeos”.
“En síntese, un diálogo social que, máis que nunca, está branqueando, unha vez máis, a ofensiva do capital contra o traballo, que nesta fase histórica iniciada tras a pandemia, está marcada pola caída do poder adquisitivo dos salarios, a extensión ao conxunto da clase traballadora dos baixos salarios, da flexibilidade, inseguridade e inestabilidade laboral, institucionalizando os abusos patronais e a precariedade laboral e a parcialidade do traballo co fomento da contratación fixa-descontinua, traballo a tempo parcial e demais”, indica a CIG.
Para alén diso, en opinión do sindicato nacionalista, “estamos ante un novo mal acordo fundamentado na renuncia de CCOO e UXT a facer da loita, da mobilización e da folga na acción sindical e na negociación colectiva a mellor ferramenta para afrontar a actual crise e a inflación descontrolada”.
"Ningún tipo de solución"
De feito, apunta o secretario xeral da CIG, Paulo Carril, o acordo estabelece unha vixencia temporal de 2023 a 2025, deixando fóra os anos 2021 e 2022, “precisamente nos cales se ten xerado a maior inflación, de 12,20%” polo que denuncia que se “agasallan á patronal estes dous anos, xa que no acordo non se contempla ningún tipo de solución”.
Xunto a isto, denuncia que se inventan o concepto ‘Medida Preventiva de Conflitos’, cun chamamento á paz social que considerou “unha declaración sen precedentes de desmobilización”, cando “o sindicalismo tería que estar á altura das circunstancias a través da loita e da mobilización, para conquistar melloras nas condicións de traballo”.
Horas e lugares das mobilizacións e das asembleas
A Coruña:
-
10.30 horas, asemblea no local sindical (Avda. Alfonso Molina).
-
12 horas, concentración na CEC (Praza de Luís Seoane, Monelos).
Compostela:
-
10 horas, asemblea no Hotel Compostela.
-
12 horas, manifestación da Praza de Galiza á sede da Confederación de Empresarios/as.
Ferrol:
-
10 horas, asemblea no salón de actos do local sindical (r/ Eduardo Pondal).
-
12 horas, concentración diante de COFER (Cantón de Molíns 8-9).
Lugo:
-
10.30 horas, asemblea no edificio sindical (Ronda da Muralla).
-
12.30 horas, concentración na sede da CEL (Praza de Santo Domingo).
Ourense:
-
10 horas, asemblea no salón de actos do edificio sindical (Parque San Lázaro).
-
12 horas, concentración diante da CEO (Praza das Damas).
Pontevedra:
-
10 horas, asemblea no local sindical (Pasantería).
-
11.45 horas, manifestación do local sindical até a sede de AEMPRE (Virxe do Camiño).
Ribeira:
-
10.30 horas, asemblea ás no local sindical (r/Estatuto).
-
12 horas, concentración na Praza do Centenario.
Vigo:
-
10 horas, asemblea no salón de actos dos Padres Capuchinos (Vázquez Varela, 15).
-
12 horas, manifestación, desde o lugar da asemblea até a sede da CEP (García Barbón).
