As persoas viaxeiras transportadas por autobús urbano na Galiza aumentaron 29,8% en novembro de 2021 a respecto do mesmo mes do ano anterior, cun total de 4,362 millóns de usuarios e usuarias.
De xaneiro a novembro de 2021, o transporte urbano en autobús medrou no país 16,4% de media, segundo informou esta quinta feira o Instituto Nacional de Estatística (INE).
No conxunto do Estado español incrementáronse os usuarios de autobús 48,4% na variación interanual o pasado mes de novembro. Todos os territorios presentan taxas anuais positivas no transporte por autobús.
As maiores subidas danse na Rexión de Murcia (91,8%), Asturies (75,7%) e Andalucía (63,5%). Pola súa parte, Canarias (16,9%), Euskadi (26,7%) e Galiza (29,8%) rexistran os menores incrementos en autobús.
Lonxe das cifras prepandemia
Se ben a repunta no número de persoas usuarias do transporte urbano permitiu o pasado ano superar con creces as cifras de 2020, hoxe o autobús segue a ser menos utilizado que antes da pandemia.
Así, en novembro de 2019 houbo 5,533 millóns de persoas viaxeiras no transporte público da Galiza.
Aliás, a excepción de 2020 e 2021, condicionados pola irrupción da pandemia, o país non baixara dos cinco millóns de usuarios e usuarias de autobús urbano en toda a serie histórica do INE, con datos desde 2012.
