Agora repúblicas

A verdade é que non se falou moito de República nas eleccións municipais de 2023. Tampouco escoitei voces reivindicativas da república nas eleccións xerais ou para elixir o Parlamento galego. Pero os tempos son chegados: 'Agora Repúblicas' é o nome da candidatura do BNG, en coalición con EH Bildu, ERC e Ara Més (Baleares) para as Eleccións Europeas do 9 de xuño onde o BNG presentará unha papeleta con candidatas, candidatos e anagrama propios. Agora si imos falar moito da República, ou non? A conquista da república non é cousa dun día ou dunha campaña electoral, senón un traballo diario e continuado. En primeiro lugar, hai que acabar cos restos da monarquía, que forma parte dos restos do franquismo, no rueiro, esculturas, distincións, retratos, nomes de centros de ensino, etc. O 19 de xuño fanse 10 anos da abdicación de Juan Carlos, unha boa ocasión para denunciar a monarquía corrupta e herdeira do franquismo Temos bos exemplos, como o de Pontevedra, alcaldía do BNG, que xa retirou a Avenida Juan Carlos I, pero continúa con rúas en Santiago, Culleredo, Camariñas, Vilanova de Arousa, Vila de Cruces, Vilagarcía; que tamén dá nome ao porto deportivo de Sanxenxo e mesmo á praza do Rei de Vigo. Ten a medalla de Bronce da Coruña desde 1976. Conserva bustos en Ferrol e Vigo. Retratos en numerosos concellos, pero María Chivite presidenta do PSOE da Comunidade Foral de Navarra, retiraba o retrato do rei Juan Carlos da Sala de Goberno en xuño de 2020. Monarquía ou república? Realizáronse consultas cívicas sobre a forma de Estado: monarquía ou república. En decembro de 2018 máis de 8.000 persoas participaron nunha consulta nos campus das tres universidades galegas. E a asemblea da Coruña de 14 de novembro de 2019 de Galiza pola República e polo dereito a decidir acordaba: "Que as organizacións e entidades que forman parte desta plataforma cívica convoquen asembleas abertas nos concellos para iniciar a preparación desta consulta". O 19 de xuño de 2014, coincidindo coa abdicación do rei Juan Carlos, convocábase unha manifestación unitaria na Coruña coa participación de máis de 3.000 persoas, baixo o lema 'Galiza pola República e polo dereito a decidir'. Ese mesmo día celebrábase en Ourense unha concentración baixo o lema 'Galiza pola República. Polo Dereito de Autodeterminación'. O manifesto lembraba que "Ourense é unha cidade historicamente republicana, onde se proclamou a I República Galega no ano 1931 [27 de xuño de 1931], cidade que acolleu a persoas tan destacadas como Alexandre Bóveda, Benigno Álvarez e tantas outras heroínas anónimas que loitaron en defensa da democracia e a liberdade no ano 1936 e contra o golpe do Estado fascista, que se levantou contra o goberno democraticamente elixido da República". Galiza pola República Constituíase esta plataforma en xullo de 2019 na Coruña, coincidindo co 50º aniversario da designación de Juan Carlos como sucesor do ditador Franco, co apoio de: AC Alexandre Bóveda, AC O Facho, AC Irmáns Suárez Picallo, CS Gomes Gaioso, Cultura Aberta de Carral, Acción Antifascista, Anova, BNG, Corrente Vermella, En Marea, Equo, Esquerda Unida, Marea Atlántica, PCG, Podemos, Propolis, Unión Republicana, Galiza Nova, Isca, XCG, CIG e CRMH. Junts, ERC, CUP, EH Bildu e BNG asinaban o 3 de febreiro de 2020 a declaración "Non temos rei. Democracia, liberdade, repúblicas", que comezaba así: "A Monarquía Española e o seu máximo expoñente, o rei de España, non nos representa. A sociedade catalá, vasca e galega rexeitan maioritariamente a figura dunha institución anacrónica herdeira do franquismo que se sustenta no obxectivo de manter e impoñer a unidade de España e as súas leis, negando así os dereitos civís, políticos e nacionais que asisten as nosas cidadanías e os nosos pobos". O Pleno de Sada de 24 de setembro de 2020 aprobaba unha moción que, entre outras cuestións, acordaba: "Instar o Goberno do Estado a que inicie os procesos necesarios para a celebración dun referendo ou consulta á cidadanía sobre a forma de Estado: monarquía ou república". A citada plataforma cívica difundía en abril de 2021 o manifesto: "Non queremos monarquía. Galiza pola República", apoiado por 76 entidades de toda Galiza, que acababa así: "Facemos un chamamento ás forzas políticas para que impulsen a creación dunha Rede de Concellos Galegos pola República e presenten iniciativas nos concellos e noutras institucións para que se aprobe a incorporación á mesma". O 19 de xuño de 2024 é o décimo aniversario da abdicación de Juan Carlos. Unha boa ocasión para realizar un traballo informativo e educativo, denunciar a monarquía corrupta e herdeira do franquismo e lembrar: Agora repúblicas!