Arredor dunha trintena de veciños e veciñas da parroquia de Recemel (As Somozas) concentrouse no mediodía desta cuarta feira fronte ao edificio administrativo da Xunta da Galiza en Ferrol, a fin de exixir á Administración a "paralización inmediata" da canteira das Viñas.
As persoas afectadas consideran que a forma máis axeitada de "garantir a seguridade das persoas e a integridade da poboación e o medio" é o cesamento da actividade extractiva neste espazo.
Acompañada do deputado do BNG no Parlamento Ramón Fernández, a veciñanza presentou un escrito dirixido a Augas da Galiza, a dirección xeral de Planificación Enerxética e Recursos Naturais e a dirección xeral de Calidade Ambiental solicitando que se cumpra a resolución aprobada por unanimidade da Cámara o pasado 16 de setembro.
O texto, presentado a proposta do Bloque, insta o Goberno galego a "adoptar as medidas que sexan precisas" na explotación mineira para velar pola seguridade "das persoas, arroios, ríos, vivendas e circulación viaria".
O parlamentario da formación frontista asegurou non entender "como durante todos estes meses os servizos da Xunta pasan por alto os danos e prexuízos que se están a producir".
A avaliación ambiental data de 1996
A Declaración de Impacto Ambiental (DIA) da canteira das Viñas foi aprobada polo Goberno de Manuel Fraga en 1996, malia que a empresa non chegou a iniciar daquela a extracción de minerais.
Para a veciñanza e o BNG, esta declaración debe considerarse "obsoleta e caduca" e cómpre someter o proxecto a unha nova DIA, xa que a normativa actual ten "moitas máis garantías".
