Unha muller de 83 anos que foi localizada morta na tarde desta cuarta feira en Los Cristianos, no municipio tinerfeño de Arona, era galega e pasaba uns días de vacacións no sur da illa co seu marido, segundo vén de confirmar o delegado do Goberno estatal en Canarias, Anselmo Pestana, en declaracións á Cadena Cope.
Os feitos producíronse a media tarde desta cuarta, contra as 16.30 horas, cando os axentes da Policía Nacional foron mobilizados a unha vivenda a través dunha chamada veciñal ao 112 e acharon o cadáver da muller, con feridas de arma branca, xunto ao seu marido e presunto asasino.
O home, de 84 anos, atópase baixo custodia policial nun centro sanitario para recuperarse das súas feridas. A Delegación do Goberno estatal xa confirmou o asasinato como un caso de violencia de xénero, tal e como apuntan as investigacións policiais.
O Goberno de Canarias, a través do Instituto Canario de Igualdade, activou o protocolo DEMA de atención ás vítimas e no Cabildo de Tenerife gardouse un minuto de silencio en sinal de repulsa.
Aumentan os delitos machistas
A Galiza rexistrou o ano pasado máis de 3 vítimas de violencia de xénero de media ao día. Así o recolle un estudo do Instituto Nacional de Estatística (INE) sobre violencia doméstica e de xénero en 2021.
O número total de vítimas rexistradas foi de 1.217, un total de 30 máis que en 2020. Un incremento de 2,5%, un pouco por debaixo de 3,2% da media estatal, e moi lonxe da variación negativa de 30% e 14% que rexistraron Melilla e Asturias, co maior descenso no Estado español.
Na Galiza, unha de cada mil mulleres maiores de 14 anos de media foron vítimas da violencia de xénero en 2021.