Á espera de que transcenda o que se decida na reunión do subcomité clínico, o presidente da Xunta, Alberto Núñez Feixoo, xa avanzou esta cuarta feira que é partidario de manter as restricións actuais -entre as que están os feches adiantados da hostalaría e o uso ampliado do Certificado Covid, entre outras cuestións- máis aló do 18 de xaneiro, tal e como estaba previsto.
O representante do Goberno galego, que falou nunha visita a Carballo, garantiu que malia a alza de contaxios do coronavirus a situación sanitaria do país "non é preocupante".
Porén, considera oportuno que se manteñan as limitacións "nas próximas semanas" até que a curva dos contaxios vaia cara abaixo.
"Parécenos que, mentres que non baixe a incidencia, debemos manter con carácter xeral as decisións que tomamos en días anteriores. Son decisións de mínimos, mínimas: mantemos a hostalaría con horarios normais e o lecer nocturno até as tres, que neste momento de contaxio masivo por ómicron, parécenos unha proposta razoábel", aclarou sobre o punto de vista do seu equipo.
Aliás, interrogado polos medios de comunicación, recoñeceu parte da denuncia que fan as e os traballadores do Sergas nas últimas datas. Existen, dixo, "tensións na sanidade, especialmente na Atención Primaria".
Se ben é certo que quixo puntualizar que o "99,3% das persoas contaxiadas están nas súas casas", asumiu que hai un incremento das hospitalizacións en unidades convencionais. Na UCI, pola contra, considera a evolución controlada e "estábel".
Por outra parte, e obviando o feito de que a Xunta eliminou hai escasos días algúns dos supostos para practicar exames de saúde a contactos estreitos de positivos por Covid-19, Feixoo destacou o papel do seu Goberno na realización de test de antíxenos.
Así, remarcou que o "obxectivo" da Galiza é coñecido: "Vacinar, facer test e pedir responsabilidade".