Alcaldes critican a inacción da Xunta da Galiza para combater os fogos na Fonsagrada

O Goberno galego deu por estabilizado o incendio forestal que arrasou máis de 1.400 hectáreas nos concellos de Baleira e A Fonsagrada (comarca da Fonsagrada) e Ribeira de Piquín (Meira). O fogo iniciouse na tarde da terza feira na parroquia baleirense de Cubilledo e non tardou en estenderse avivado polos ventos da zona, a situación de abandono de diversos lugares e a falta de medios humanos e materiais para combater o lume. A proximidade das lapas aos núcleos de poboación obrigou a decretar a alerta 2 e a desaloxar tres lugares en Baleira. Neste sentido, o alcalde da localidade, Miguel Angel Fernández (PP), afirmou a este xornal que “entre 30 e 40 persoas víronse obrigadas a abandonar a súa vivendas pola presenza do incendio moi perto das casas. Galiza conta con 2.300 efectivos menos para a extención de incendios A situación máis complicada rexistrouse nos lugares da Cortevella, Murias e Forneas. Estes tres núcleos de poboación da parroquia baleirense de Martín enfrontaron o lume durante horas, sendo necesario desaloxar os dous primeiros e obrigando o terceiro a aumentar o grao da alarma. Precisamente, as lapas continuaban na Cortevella ao feche desta edición. A Xunta da Galiza destacou a importancia dos medios empregados no traballo de extinción. Neste sentido, as autoridades confirmaron a presenza en Baleira de catro técnicos, 24 axentes, 41 brigadas, 23 motobombas, tres pas, unha unidade técnica de apoio, dous avións, tres helicópteros. Asemade, aos medios despregados pola Administración galega sumáronselle membro da Unidade Militar de Emerxencias (UME). Baleira A veciñanza de Baleira consultada por Nós Diario denunciou a falta de equipos e de persoal do Goberno galego na loita contra lume. Neste sentido, o responsábel local do BNG na localidade, Tino Díaz, asegurou a este xornal que “as vivendas de varios lugares foron salvadas polos propios veciños”. VÍDEO | Así avanzou durante a noite o lume en Baleira Díaz explicou que “o estado de abandono de moitos lugares como consecuencia do despoboamento e a deficiente conservación dalgunhas infraestruturas públicas favoreceron a expansión do lume”. Así, as lapas comezadas en Baleira conseguiron cruzar o río Eo na Ribeira de Piquín e o río de Piñeiro na Fonsagrada pola falta de mantemento das canles fluviais, cubertos dunha beira a outra de vexetación e maleza. A Fonsagrada O concello da Fonsagrada foi o outro municipio máis afectado polo fogo. Neste caso, as lapas avanzaron sen control polos lugares da Boucisca, Castañosín e Estremeiro, favorecendo a súa extensión as condicións orográficas do terreo, as circunstancias meteorolóxicas e a falta de medios. Precisamente, o alcance do incendio nestes tres núcleos da parroquia de Piñeiro obrigou a desaloxar a todos os residentes dos mesmos. O alcalde da Fonsagrada, Carlos López (PSdeG), lembrou a Nós Diario “as dificultades do traballo por tratarse dunha zona de montaña, moi separada do centro do municipio e cuns accesos moi difíciles”. A este respecto, destacou que “o vento impediu operar aos equipos áreos, dificultando aínda máis o labor dos que por terra nos enfrontabamos ao lume”. Neste sentido, lamentou a falta de medios achegada pola Xunta, “que só mandou unha brigada e unha motobomba xa tarde”. A primeira gran vaga de incendios do ano arrasa máis de 1.300 hectáreas, co de Baleira aínda activo e á cabeza As tarefas de extinción recaeron sobre o persoal e os vehículos do Concello de Fonsagrada. Neste liña, o rexedor apuntou que “cando soubemos do lume por un veciño mandamos para alí as dúas carrocetas do concello e todos os traballadores da brigada de obras, porque a esta altura do ano aínda non contamos con brigada de incendios ao non estar asinado o convenio coa Xunta”. López insiste, “os lumes apáganse con moita prevención” e reclama ao Goberno galego “máis medios para contar con persoal de prevención de incendios durante todo”. Nesta dirección, asegura que “os lumes combátense no inverno” polo que exixe un cambio nas políticas de loita contra o lume. Ribeira de Piquín O alcalde de Ribeira de Piquín, Roberto Fernández (PSdeG), partilla as mesmas críticas sobre a falta de medios formuladas polo rexedor da Fonsagrada. Neste sentido, indica a Nós Diario que a situación máis crítica viviuse no lugar de Barangón, na parroquia de Santalla, “onde a veciñanza e os traballadores municipais combateron en solitario o lume, contando co tractor municipal e unha motobomba que nos cedeu o Concello de Meira”. Lobios homenaxea tres pilotos falecidos en labores de extinción de incendios Fernández significa que “o persoal da Xunta chegou tarde, cando xa non era necesario, pasadas as tres da mañá e cando a situación estaba controlada”. Nesta dirección, denuncia que “os medios do Goberno galego son claramente insuficientes” e que “a sorte foi que o lume prendeu en marzo e non en outubro porque se o incendio fose en outubro levaría boa parte do concello por diante”. Política forestal O rexedor da Ribeira de Piquín reclama unha mudanza na política forestal. A este respecto, alerta de que “a Xunta da Galiza aposta pola extinción dos incendios, mais non pola prevención” e urxe “a unha profesionalización dos servizos de loita contra o lume”. No mesmo sentido, advirte dos “riscos da forestación masiva, que explica que todos os alcaldes esteamos tremendo por se hai un incendio”. A Xunta da Galiza non activará até xuño o seu operativo contra o lume A falta de medios para loitar contra os incendios marcou a actualidade na xornada desta quinta feira. A este respecto, o presidente do Goberno galego, Alfonso Rueda, sinalou na rolda de prensa posterior ao Consello da Xunta que o seu Executivo “non ten previsto adiantar o operativo de loita contra o lume” malia que “traballa para que o dispositivo estea "preparado para cando chegue o período de risco alto”. Alfonso Rueda indicou que "non estamos afeitos a incendios tan grandes nesta época", se ben puxo en valor o traballo do seu Goberno afirmando que "se fixo moito nas tarefas de roza e de limpeza, para tratar de reducir os riscos”. A Xunta da Galiza culpa do incendio a neglixencia dun veciño. A Galiza perde anualmente 41 millóns de toneladas de solo A ausencia de persoal e de equipos para combater os incendios foi, tamén, denunciada na xornada desta quinta feira pola Central Sindical Independente e de Funcionarios (CSIF), que reclamou ao Goberno galego “a reincorporación de parte de 1.000 bombeiros forestais fixos descontinuos”. Neste sentido, a organización sindical criticou que a Xunta da Galiza “mantén sen actividade máis de 50% do persoal de loita contra o lume malia a alta probabilidade de que se produzan incendios forestais”. Desde esta entidade sindical demandan tamén “medidas máis contundentes na defensa dos montes” e revelaron que a Administración galega ten un “gran número de prazas estruturais sen cubrir". Asemade, denuncian que “non están activos os convenios de colaboración cos Concellos previstos no Plan de prevención e defensa contra incendios forestais da Galiza.