Así é a nova lei da Xunta que deixa os recursos naturais en mans das mineiras e as empresas eléctricas

O anteproxecto de Lei de promoción dos beneficios sociais e económicos dos proxectos que utilizan os recursos naturais da Galiza non convence ás principais organizacións sindicais do país nin á Federación Galega de Confrarías. Neste sentido, as referidas entidades defenden unha mudanza substancial nos contidos da proposta lexislativa para garantir que os proxectos enerxéticos e extractivos xeren un beneficio económico e social para Galiza. O secretario xeral da CIG, Paulo Carril, e a responsábel de organización do sindicato, Susana Méndez, explicaron esta segunda feira que a comisión redactora do ditame da norma no Consello Económico e Social (CES) aprobou, co único voto en contra da Confederación de Empresarios da Galiza, “un texto moi crítico co anteproxecto precisamente nese sentido de que os contidos da norma non responden ao suposto obxectivo da mesma de repercutir dalgún xeito os beneficios da explotación de recursos no pobo galego”. O ditame do CES As modificacións da norma propostas pola CIG e avaladas pola UXT, CCOO, SLG e a Federación Galega de Confrarías están pendentes do pleno do CES para ser trasladadas ao Goberno galego. Porén, as fontes do organismo consultadas por Nós Diario apuntan a que “sería inaudito que o pleno do CES lle dese a volta a un ditame da comisión, algo que nunca ten acontecido desde a fundación do CES en 1995”. A maiores, engaden que “unha modificación do ditame da comisión está taxada polo regulamento da entidade, que no caso de levarse a cabo incumpriría as normas de funcionamento interno". As eléctricas buscan influír na xustiza para controlar o negocio eólico na Galiza As propostas introducidas no ditame do anteproxecto de Lei de recursos naturais da Galiza recollen que aquelas compañías que pretendan ser beneficiarias de concesións para explotar os recursos eólicos, hídricos ou mineiros do país “deberán ter sede social e fiscal na Galiza, facendo fronte ao pagamento de todos os tributos na Galiza”. Asemade, “no caso de ser de aproveitamento enerxético, dunha bonificación directa na factura eléctrica/térmica de 10% para as persoas consumidoras domésticas de 30% para as actividades económicas con domicilio nos concellos afectados”. As medidas recollidas no relatorio tentan utilizar os recursos naturais da Galiza para promover o seu desenvolvemento económico. A este respecto, defenden que as instalacións de renovábeis ou mineiras deben asociarse a “proxectos de desenvolvemento económico ou plans industriais asociados propostos para a súa implantación nos territorios afectados nos que se aproveite todo o valor engadido. Polo tanto, relacionados coa produción ou extracción, segunda transformación e feche do ciclo produtivo para a súa comercialización”. As alternativas formuladas no ditame aspiran a garantir o beneficio social destes proxectos, mediante unha presenza significativa do sector público. Nesta liña, apóstase pola “creación dunha Empresa Pública Galega de Enerxía que xestione as centrais hidroeléctricas cuxa concesión está vencida ou caducada e as que vaian vencendo ou caducando e, así mesmo, controle as participacións accionariais que ten ou vai ter a Xunta noutras empresas enerxéticas”. A nova lexislación eólica da Xunta incumpre a normativa estatal e comunitaria A resposta do Goberno galego a estas medidas chegou na mesma mañá desta segunda feira da man de María Jesús Lourenzá. A conselleira de Economía e Industria, que participaba canda o presidente galego, Alfonso Rueda, na presentación da sociedade mixta Recursos da Galiza, cargou contra a central sindical nacionalista por impulsar estas propostas na comisión redactora do ditame da norma no CES. Nesa perspectiva, apostou por deixar a Lei de promoción dos beneficios sociais e económicos dos proxectos que utilizan os recursos naturais da Galiza na súa redacción actual e significou o relevo na nova empresa da Xunta da Galiza no impulso da actividade enerxética e mineira. Recursos da Galiza A mercantil Recursos da Galiza está participada polo Goberno galego e contará no seu capital con máis de 30 sociedades, sendo a súa razón social a participación “en proxectos de xeración de enerxías verdes, de aproveitamento da riqueza mineira ou iniciativas que requiran concesións de augas”. Alfonso Rueda presentou a iniciativa como “punta de lanza” de Lei de promoción dos beneficios sociais e económicos dos proxectos que utilizan os recursos naturais da Galiza. Recursos de Galiza estará participada en 30% do capital co Goberno galego, repartíndose o resto das participacións empresariais compañías como Abanca, Finsa, Megasa, Valtalia, Copasa, Gesuga, o Grupo Nogar, Pérez Rumbao, Jealsa, Revi, Profand, Ence, Exlabesa, ARP Global, AIN Active, Severiano, Intaf, Genesal, Industrial Recense, Mecanizados Acebrón, Cover Global, Edigal, Tecdesoft, Ertec Iberia, Integria Energía Empresas, Eroxona, Sertogal, Twinleads, Wind1000, Epifanio Campo, Aceites Abril e Megaro Foods. A fiscal de Medio Ambiente compara o 'boom' eólico actual co urbanístico da crise de 2008: "Hai que facelo con moderación" Alfonso Rueda destacou na presentación da compañía que “non imos resignarnos a quedar á marxe do desenvolvemento das enerxías verdes en toda Europa: aspiramos a estar no centro”. significando o potencial da Galiza no ámbito das renovábeis. Nesta dirección, argumentou que “falar de enerxía é falar de postos de traballo, de riqueza e dun dos principais vectores de futuro para a nosa comunidade”. A CIG urxe unha mudanza de fondo na Lei dos recursos naturais da Galiza O secretario xeral da CIG, Paulo Carril, aseverou esta segunda feira que “a Lei de promoción dos beneficios sociais e económicos dos proxectos que utilizan os recursos naturais da Galiza, lonxe de promover beneficios sociais para o pobo converte o público nun facilitador para que desde o ámbito privado se entre a saco nos recursos naturais do noso país”. Neste punto, lamentou que “nos contidos da norma non se plasman as reivindicacións sociais que desde hai anos se están realizando”. Carril denunciou que a norma busca facer da declaración adxudicada discrecionalmente de “interese público superior” unha especie de “barra libre” para facilitar a entrada de empresas privadas a saquear os recursos, paisaxe e patrimonio da Galiza cunha maior rapidez e unha menor garantía de participación e co mínimo estudo de impacto”. Neste sentido, criticou que “desde o punto de vista medioambiental reláxanse até o estremo de case facer nulo calquera tipo de control ambiental e ademais xógase perversamente a que a declaración de impacto ambiental”. O dirixente sindical sitúa este texto lexislativo na liña das denominadas leis de depredación que o Partido Popular leva impulsando na Galiza desde 2017. Neste sentido, algunhas das disposicións recollidas nas mesma chocaban coa propia normativa comunitaria, sendo anuladas en resolucións xudiciais do Tribunal Superior da Galiza. Sen ir máis lonxe, o marco legal promovido polo PP chegou a reducir o trámite de exposición pública para os proxectos eólicos a 15 días, cando as directivas comunitarias fixan un prazo mínimo dun mes.