O presidente da Xunta, Alberto Núñez Feixoo, asegurou este domingo que o Sergas estuda a posibilidade de instalar “hospitais extramuros”, os coñecidos como “hospitais de campaña”, en Compostela e na Coruña. Así o afirmou en resposta ás preguntas dos medios na rolda de prensa en que deu conta da reunión telemática dos presidentes das autonomías co xefe do Executivo español, Pedro Sánchez.
“Onte tivemos distintos contactos con xerentes de hospitais, concretamente co da Coruña e co de Compostela ante a eventualidade de ter que prever ampliar os aforos dos hospitais fóra dos recintos hospilatarios públicos e privados”, sinalou, “ese risco existe”. Afirmou que na Coruña e en Compostela hai máis posibilidades de que se instalen hospitais de campaña, e engadiu que Ferrol tamén podería necesitar dunha área hospitalaria extra.
“Démoslles aos xerentes a posibilidade de que nos fagan unha proposta oportuna e mañá probabelmente teñamos unha decisión tomada sobre o lugar en que preveriamos un hospital extramuros”, expuxo Feixoo, que avanzou que na terza feira comunicaría o resultado das decisións.
Uso da rede privada
A pregunta do número de camas e prazas UCI de hospitais privados está empregando o Sergas, Feixoo dixo non dispor do número, “mais si estamos utilizando camas e UCI no conxunto da Galiza”. Afirmou que “intentamos levar os pacientes aos sitios máis protexidos” e asegurou que toman a decisión de desvialos a centros privados en función da dimensión deses hospitais, dos compoñentes e equipamentos cos que contan, do número de camas UCI, de se son centros médicos ou cirúrxicos ou da carteira de servizos.
Salientou que a rede de hospitais privados “está a disposición do servizo público” e advertiu de que “se tivésemos algún hospital que non está a ser leal co servizo de saúde, actuaríamos coa Inspección de Sanidade”.
