O alcalde de Ourense, Gonzalo Pérez Xácome, cualificou os concelleiros do Partido Popular (PP) que o apoiaron para acadar a Alcaldía como "inútiles", en referencia ao pasado mandato.
"Todo se fai neste mandato porque vostedes non facían absolutamente nada", afirmou Xácome durante a celebración dun pleno extraordinario convocado para modificar as anualidades dun convenio coa Confederación Hidrográfica Miño-Sil.
O alcalde fixo o comentario despois de que o portavoz de Ciudadanos (C's), José Araújo, expuxese que o acordo comezou a prepararse no pasado mandato, cando el aínda formaba parte do Partido Popular. "Está a inaugurar cousas nas que non tivo que mover un dedo", dixo.
"Estamos a facer en obras 30 veces máis", proclamou Xácome, quen asegurou que entre 2015 e 2019, Ourense pareceuse "ao medievo". Tamén afirmou que o seu Goberno local, non lle dá publicidade "a todo" o que fan porque é a súa "obriga".
O "peor" do PP
Pediu entón quenda de palabra o portavoz do Partido Socialista (PSOE), Rafael Rodríguez Villarino, para preguntar ao alcalde "como é gobernar cos maiores inútiles do Concello de Ourense nos últimos anos", utilizando as súas propias palabras.
Xácome respondeu que o Partido Popular xa non ten ás mesmas persoas, "non está nin un alcalde que critiquei moito, Jesús Vázquez, nin José Araújo".
Precisamente, do portavoz de C´s dixo que "non é un cambia chaquetas, senón un cambia partidos, empezou no PP agora está en C's e xa debería ir buscando un novo partido".
Ademais, engadiu en referencia a este que, "grazas a deus foise o peor". "Ao final tivo sorte o PP, do mesmo xeito que nós en Democracia Ourensá, tivemos sorte de que se nos fosen os tránsfugas, porque eu era tan bo que non era capaz de botalos", concluíu.