Pontón sobe a un camión para prometer que pelexará co Estado pola liberación das peaxes da AP-9 e a AP-53

A candidata do BNG, Ana Pontón, prometeu esta segunda feira que se alcanza a Presidencia da Xunta da Galiza após as eleccións do 18 de febreiro demandará a creación dunha comisión bilateral co Estado para abordar a liberación de peaxes nas autoestradas AP-9 e a AP-53, así como a súa transferencia para que se xestione desde a Administración galega.

Fíxoo antes de subir a un camión xunto a un transportista en Sigüeiro (Oroso) para percorrer parte da Autoestrada do Atlántico e o tramo da AP-53 entre Santiago e Lalín (Deza), vías que "simbolizan o agravio e a discriminación" cara á Galiza en materia de infraestruturas. "Só hai tres autoestradas en todo o Estado español que teñan o máximo legal de 75 anos [de concesión] e dúas están na Galiza", sentenciou, e subliñou que lograr a liberación de peaxes nestas vías é unha "cuestión de país", pois "penaliza" os seus cidadáns e a capacidade de desenvolvemento económico da Galiza.

Por iso, situou entre os seus compromisos electorais a petición ao Estado da apertura dunha comisión bilateral mixta que aborde, por unha parte, a transferencia efectiva da titularidade das autoestradas á Galiza e, por outra, a liberación das súas peaxes, como xa ocorre con "todas" as infraestruturas viarias de "a súa xeración".

Neste sentido, subliñou que Galiza "ten que ter o mesmo dereito" que cataláns e vascos, aos que se traspasaron autoestradas das características das galegas, á vez que asegurou que "é posíbel e factíbel" que se rescate a concesión da AP-9 prorrogada polo Goberno daquela presidido polo popular José María Aznar até 2048, "superando o límite legal", salientou.

Pontón remarcou que a Autoestrada do Atlántico, unha infraestrutura "requeteamortizada", debería ser libre de peaxe desde o 17 de agosto do pasado. "E isto non é así por responsabilidade directa do PP", aseverou a candidata nacionalista, que lembrou que gobernos do PSOE "tamén" aprobaron extensións da concesión de explotación a Audasa, compañía que "no último ano recadou máis de 150 millóns de euros" a través de peaxes.

Aforro de 600 euros "grazas ao BNG"

Após incidir en que a batalla por liberar de tarifas estas autoestradas é unha "cuestión de xustiza", Pontón apuntou que as rebaixas nas peaxes foron "grazas ao BNG" e os seus acordos de investidura co PSOE no Estado. "Unha persoa que teña que circular pola AP-9 entre Coruña e Vigo; e faga o traxecto 20 veces ao mes, en viaxes de ida e de volta, sen eses descontos que conseguiu o BNG estaría a pagar 776 euros. Grazas aos descontos do BNG hai un aforro que son case 600 euros", sentenciou a candidata frontista.

"Cremos que é o momento de dar un paso adiante e ter un goberno que realmente se comprometa, non só a conseguir a transferencia, que é importante, senón tamén a conseguir esa transferencia libre de peaxes para os galegos e as galegas, e que poñamos fin a unha discriminación", concluíu.

Manifestación do sector do mar

Por outra parte, Ana Pontón confirmou que participará na manifestación convocada este domingo en Santiago de Compostela por colectivos do mundo do mar e organizacións ecoloxistas en defensa do medio mariño e en protesta pola xestión da vertedura de pellets. "Persoalmente vou estar porque non podemos tolerar o abandono á xente do mar e ao noso mar por parte do goberno do PP", sinalou, e aseverou que a Xunta "nin está nin se lle espera" nunha crise á que chegou "tarde, mal e arrastro" e na que "está a repetir o mesmo protocolo" que co Prestige.