Pachi Vázquez, anunciou hoxe que a primeira proposición de Lei do PSdeG-PSOE nesta lexislatura será a do imposto á banca. Así o dixo logo da xuntanza protocolaria coa presidenta do Parlamento antes do debate de investidura, na que reclamou un Parlamento “máis áxil e dinámico” para “resolver os problemas dos cidadáns”.
Pachi Vázquez salientou que o imposto á banca, que centrará a primeira lei que presenten desde o PSdeG nesta lexislatura parlamentar, é necesario para acadar os ingresos para afrontar as políticas sociais e protexer os servizos públicos. Lembrou tamén que esta iniciativa ven de ser avalada polo Tribunal Constitucional en Estremadura, e aplicada en Andalucía e Canarias. E dixo que con esta achega @s socialistas galeg@s anticipan unha oposición “dura e contundente pero tamén propositiva para ser útil aos cidadáns”.
Desde o PSdeG estiman que este imposto permitiría recadar perto de 60 millóns de euros ao ano, "uns recursos adicionais que permitirán equilibrar os orzamentos autonómicos reforzando o financiamento de servizos públicos como a sanidade ou a educación reducindo o déficit público”.
Vázquez explicou, aliás, que esta proposta "debe garantir que as entidades non poidan repercutir a terceiros a cota deste imposto".