Negociacións do PP con ETA

Para o 21 de abril están convocadas eleccións en Euskadi e a estratexia do Partido Popular segue centrada en equiparar Bildu con ETA. Para Borja Sémper, portavoz do PP na actualidade, "Bildu non é ETA. É unha coalición. Que todo sexa ETA non é certo. ETA acabouse. O futuro da sociedade vasca, guste ou non en determinados sitios, ten que construírse tamén con Bildu", (Europa Press, 5-1-2013). Intervención de Javier Maroto, alcalde de Vitoria, dirixíndose a Antxon Belakortu, concelleiro de Bildu, durante un debate dos orzamentos: "Non me tremen as pernas para chegar a acordos con ninguén. E creo que iso é bo. Oxalá sucedese en máis foros. Oxalá se propagase o exemplo", (El Mundo, 9-1-2013). Cando ETA deixa de matar, o PP quedou sen discurso e José Manuel García Margallo (ministro de Asuntos Exteriores de 2011 a 2016 e eurodeputado do PP desde 2019) manifestaba: "Desde que non nos matan non temos proxecto", (declaracións en La Sexta, 22-5-2020). A verdade é que un ano despois do asasinato de Miguel Ángel Blanco, Aznar negociaba con ETA Isabel Díaz Ayuso, presidenta da Comunidade de Madrid, ten as cousas claras, pronunciábase pola ilegalización de Bildu e manifestaba: "ETA está viva, está no poder, vive do noso diñeiro, mina as nosas institucións, quere destruír España, privar a millóns de españois dos seus dereitos constitucionais e provocar unha confrontación", (Europa Press, 18-5-2023). Feixoo participaba nunha manifestación con Abascal en Pamplona en apoio da alcaldesa de UPN o 17 de decembro de 2023. Consideraba que Joseba Asiron, de Bildu, non podía ser alcalde a través dunha moción de censura (as candidaturas progresistas sumaban 56.484 votos e 16 concelleiras/os e a dereita 39.217 votos e 11 concelleiras/os) e denunciaba a "indignidade" do PSOE porque "dá a alcaldía a unha marca independentista e, o que é peor, herdeira dunha organización terrorista". Entre eses supostos herdeiros de ETA estaría Asiron: "En 1998, despois do asasinato por ETA do concelleiro Tomás Caballero (UPN), asinou xunto a outras 133 persoas do mundo da cultura un manifesto de condena do terrorismo", (La Voz de Galicia, 29-12-2023). Estamos ante unha nova farsa protagonizada por Feixoo porque o PP si negociou con ETA e foi "xeneroso" cos seus presos. Por outra parte, para facilitar esas negociacións con ETA o Goberno do PP tomaba iniciativas políticas e o Congreso dos Deputados aprobaba por unanimidade unha moción o 10 de novembro de 1998 que instaba o Goberno a desenvolver "unha nova orientación consensuada, dinámica e flexible da política penitenciaria da forma que mellor propicie o fin da violencia". ETA asasina a Miguel Ángel Blanco o 13 de xullo de 1997 e dous meses despois, 16 de setembro, Jaime Mayor Oreja (ministro de Interior do Goberno de Aznar) declaraba: "Estamos dispostos a dialogar, flexibilizar a política penitenciaria e estudar unha reinserción dos membros de ETA, facer o que sexa necesario, sen exixencias previas, sen negociar a entrega de armas, pero a paz depende deles", (entrevista en Le Monde). O Goberno de Pedro Sánchez acordaba o 31 de agosto de 2022 o traslado a cárceres de Euskadi de 13 presos de ETA, en cumprimento da lexislación vixente, mais o PP estaba en contra dese traslado. A verdade é que un ano despois do asasinato de Miguel Ángel Blanco Aznar negociaba con ETA e o Goberno do PP excarcerou 200 persoas de ETA, achegou a cárceres vascas 135 e permitiu que máis de 300 regresasen a España. Cronoloxía e titulares 4-5-1998. Aznar: "Merecería a pena a xenerosidade se así lográsemos a paz" (El País). 12-7-1998. Aznar empraza o contorno de ETA a responder á súa oferta de diálogo (El Mundo). 1-11-1998. Aznar non exixirá a ETA entregar as armas (El País). 4-11-1998. Aznar autoriza que representantes do Goberno dialoguen directamente con ETA. (El Mundo). 5-11-1998. Piqué [portavoz do Goberno] aclara que o Goberno está disposto a dialogar "directamente" con ETA (El País). 18-11-1998. O Goberno estuda novos traslados de presos de ETA antes de Nadal (El Mundo). 7-6-1999. Aznar confirma a reunión entre o Gobierno e ETA hai tres semanas (El Mundo). 16-5-2001. "A independencia vasca é lexítima se non se impón pola forza". (Declaracións de Aznar en Radio Nacional). 20-10-2011. ETA anuncia o cesamento definitivo da súa actividade armada. ETA anunciaba a súa disolución o 3 de maio de 2018, pero o PP segue actuando como se existise e inventándose proetarras, todo por interese electoral.