A negociación e os acordos alcanzados con todas as forzas nacionalistas permiten a Sánchez ser presidente

Case catro meses despois das eleccións estatais, e con múltiples acordos de investidura e lexislatura polo medio, o Estado español xa ten novo Goberno, que estará encabezado unha vez máis por Pedro Sánchez, do PSOE, que leva no poder desde 2018, ao recibir hoxe o apoio no Congreso, na segunda xornada da sesión de investidura, dos 31 escanos de Sumar, os sete de Esquerra Republicana de Catalunya (ERC) e Junts, os seis de EH Bildu e cinco do Partido Nacionalista Vasco (PNV), e dos representantes do Bloque Nacionalista Galego (BNG) e Coalición Canaria (CC), amais dos 121 do PSOE. Só votaron en contra o Partido Popular, PP (137), Vox (33) e Unión del Pueblo Navarro, UPN (1). No debate previo, Néstor Rego, deputado do BNG, comezou a súa intervención reclamando máis ao Goberno do Estado español para frear a “brutalidade deshumana desatada por Israel”, en referencia á agresión contra Palestina. “Israel está a cometer á vista de todo o mundo crimes de guerra e de lesa humanidade, un xenocidio e unha limpeza étnica” para facerse co territorio palestino, explicou. Após facer énfase en que “o noso obxectivo é a plena soberanía” da Galiza, algo imprescindíbel para “desenvolver plenamente as súas potencialidades”, destacou que a pesar das “diferenzas puidemos chegar a acordos”, recalcando que o pacto entre BNG e PSOE “contribúe a mellorar a vida de todas as galegas e galegos”. Máis alá do asinado, o BNG “fica coas mans libres” para continuar loitando por “derrogar totalmente a reforma laboral do PP, o que non fixeron en 2022”, así como a Lei de Seguridade Cidadá, coñecida como lei mordaza. Rego reivindica o acordo de investidura asinado co BNG para "avanzar nos dereitos da Galiza" Neste apartado, reiterou a necesidade de “frear a ofensiva do espolio eólico”, que se aprobe unha tarifa eléctrica galega ou unha “transición [ecolóxica] xusta nas Pontes e Meirama", lembrando a folga xeral convocada pola Confederación Intersindical Galega nas Pontes o 23 de novembro. No que atinxe ao pacto de investidura, salientou a transferencia de “todas as competencias pendentes, que son moitas” despois das “cero competencias asumidas” no Goberno de Alberto Núñez Feixoo, actual líder estatal do PP, durante o seu paso pola Xunta entre 2009 e 2022, o aumento das pensións mínimas, a implantación dun sistema ferroviario de proximidade e a normalización da lingua ou os novos xulgados de violencia de xénero. "Estaremos moi atentos ao cumprimento dos acordos”, ratificou. Asemade, sinalou que “o BNG está a traballar para facer realidade a mudanza política na Galiza”, e adiantou un Goberno galego liderado polo BNG nas vindeiras eleccións, un Executivo que “non dependa de Xénova”, a rúa madrileña na que se sitúa a sede do PP. “Oxalá” o “cambio chegue tamén á Xunta e poidamos impulsar a axenda de transformación”, indicou Sánchez na súa réplica a Rego, enumerando distintos puntos do acordo de investidura cos nacionalistas, como a ampliación dos permisos de maternidade e paternidade a 20 semanas, a difusión da obra de Castelao, a ampliación das bonificacións nas autoestradas galegas ou acelerar a construción da A54. Sánchez eríxese en "muro de contención" contra a dereita "que branquea" Vox entre acusacións de "ilexítimo" e "golpista" Todo isto para acabar co “retroceso da Galiza” cos Gobernos conservadores no Estado e no país, inculpando Feixoo por non construír en 13 anos “nin unha soa residencia para maiores” e fechar “138 colexios públicos” en paralelo á desaparición de 40.000 empregos industriais, e comprometeuse a “seguir apostando e investindo na Galiza como se sinala no acordo”. Na contrarréplica, Rego gabouse de que Sánchez asumira “algo que nós levamos moito tempo dicindo” e que “agora xa saben o que significa Feixoo”, un “bo xestor” para “as empresas amigas que se lucran coa precarización e privatización dos servizos públicos”. Tamén lembrou que parte das actuacións da pasada investidura acometidas na Galiza partiron precisamente do acordo de investidura asinado daquela co PSOE. "Abrir unha nova fase" “Non hai Goberno de progreso neste Estado sen a concorrencia das forzas soberanistas de Euskal Herria, Catalunya e a Galiza”, subliñou a voceira de EH Bildu, Mertxe Aizpurua, que fixo énfase en que, ao tempo, “somos os independentistas os que impedimos que os reaccionarios cheguen ao poder, que ninguén o esqueza”. Facendo un chamamento a “abrir unha nova fase”, afirmou que “esta debe ser a lexislatura da plurinacionalidade, sen présa nin ansiedade”, e sostivo que Sánchez “debe gobernar para as clases populares e traballadoras”. Pola súa parte, Aitor Esteban, portavoz do PNV, criticou que a dereita e a extrema dereita cuestionaran a lexitimidade da investidura e do Executivo, incidindo en que “cando ao que non é un golpe de Estado se lle chama así a calquera cousa se lle pode chamar así”, inquirindo se “[o rei español] Felipe VI é un golpista” por designar Sánchez como candidato. De tractores gripados e ministerios: que ofreceu Feixoo ao PNV a cambio de apoiar a súa investidura? En alusión aos intentos do PP de negociar coa formación a investidura de Feixoo, mantivo que “algún día contarei o que nos chegaron a ofrecer hai un par de meses”, denunciando que “os acordos cos partidos nacionalistas sempre se consideran ilegais”. Segundo sinalou hoxe O Diario Vasco, Feixoo tería prometido ao PNV o Ministerio de Industria. Podemos critica a súa exclusión do Executivo A ministra de Dereitos Sociais na pasada lexislatura e líder de Podemos, Ione Belarra, reclamou a Sánchez e Díaz que rectifiquen o “posíbel veto” á entrada da formación no Goberno, e definiu Sumar -na que están integrados- como “esquerda dócil” e “de réxime”, e revelou que Díaz “non me chama desde xullo”, mentres que a voceira de Sumar, Marta Lois, insistiu en que haberá un Goberno de carácter “progresista, feminista e verde”. Belarra acusa PSOE e Sumar de querer vetar Podemos no próximo Executivo estatal Resto de formacións A deputada de CC, Cristina Valido, defendeu o seu acordo co PSOE, “que responde aos intereses da cidadanía canaria”. O partido insular é o único que apoiou a investidura de Feixoo e tamén a de Sánchez. Pola súa banda, Alberto Catalán, de UPN, criticou a amnistía. O portavoz de ERC, Gabriel Rufián, acusou á última hora da primeira xornada da sesión o Estado de practicar unha “guerra xudicial” por medio de xuíces ao “servizo de PP e Vox”, e lembrou a Sánchez que “temos capacidade” para “obrigarlle a acabar coa represión” e, “quizais, a que se vote un referendo mañá”. A voceira de Junts, Míriam Nogueras, reiterou a súa aposta pola independencia de Catalunya e asegurou que non votarán a favor de ningunha iniciativa na lexislatura de non producirse avances na negociación bilateral co PSOE.