Luís López foi elixido cun 97,3 por cento dos votos como presidente do PP provincial de Pontevedra, un cargo no que, dixo el, "sucede" non "substitúe" a Alfonso Rueda, actual presidente da Xunta e do PP galego tras a marcha de Alberto Núñez Feixoo a Madrid para liderar as filas estatais. O alcumado 'Lugués' polas súas orixes na provincia que dirixe (en canto ao PP se refire) Elena Candia, comprometeu "reimpulsar" Pontevedra coa mirada posta nas municipais do próximo ano e conquistar máis alcaldías.
Estes son os mesmos deberes que lle impuxo Alfonso Rueda, partidario, como Feixoo -dixo-, de marcarse obxectivos. O presidente do PP galego lembrou que os populares quedaron a "un ou dous concelleiros" en moitos concellos de lograr a maioría absoluta e que isto motivou quedar fóra da Alcaldía, polo que chamou a traballar e loitar por conseguir máis respaldo na cita de 2023.
A Luís López, que ademais estivo arroupado pola secretaria xeral do PP galego, Paula Prado, case todos os conselleiros do Goberno galego e o presidente do Parlamento, Miguel Santalices; acompáñanlle na dirección do partido, tras este 19 congreso provincial, Luisa Piñeiro como secretaria xeral, Pepa Pardo (concelleira en Pontevedra) como vicesecretaria de Organización e Javier Tourís (tenente de alcalde de Vilanova de Arousa) como vicesecretario de Acción Electoral.
Como vicepresidentes da dirección provincial sitúanse Nidia Arévalo (alcaldesa de Mos), Marta Fernández-Tapias (presidenta do PP de Vigo) e Rafa Domínguez (presidente do PP de Pontevedra). O portavoz do partido en Pontevedra é Alberto Pazos Couñago, deputado no Parlamento de Galiza.
Así mesmo, a candidatura presentada por Luís López, a única rexistrada e que resultou validada, conta como vicesecretarios executivos ás seguintes persoas: María Ramallo (alcaldesa de Marín), Jorge Cubela (alcalde de Cerdedo-Cotobade), José López (alcalde da Estrada), Telmo Martín (alcalde de Sanxenxo), José Crespo (alcalde de Lalín), Julio García-Luengo (alcalde de Crecente) e Alejandro Lorenzo (alcalde do Porriño).
Entre os coordinadores comarcais destacan o conselleiro de Cultura e Educación, Román Rodríguez (Deza); o conselleiro de Sanidade, Julio García Comesaña (Vigo); e o secretario xeral de Política Lingüística, Valentín García (para Tabeirós-Montes).
