Luís Eyré Palleiro, beirista histórico, ten a convicción de que Anova se equivoca ao ir con Izquierda Unida ás europeas. De feito, baixo o seu ponto de vista, a expresión correcta para se referir á parcería con IU neste proceso eleitoral é a de "integración" na listaxe da organización que lidera Cayo Lara e non a de coligación.
Segundo publica LaVozdeGalicia.es, Eyré di presentar a súa candidatura para emendar o erro "estratéxico" que, ao seu xuízo, comete Anova ao ir con IU.
Eyré dirixía con Mario López Rico, outro clásico do beirismo, o até hai ben pouco sector oficial de Anova. Deveu en sector crítico unha vez que a súa aposta na política de alianzas para as europeas saír derrotada por apenas 11 votos no referendo convocado entre a militancia. Defendían unha coligación con forzas nacionalistas de esquerdas e/ou coa esquerda rupturista española (unha fórmula coa que aparentemente aludían á plataforma Podemos). Esa era a postura en teoría maioritaria dentro da dirección de Anova. Foino até que no último momento Beiras abandonou a súa vella garda pretoriana para ir cabo do seu delfín, Martiño Noriega, promotor dun proceso de converxencia-fusión con Esquerda Unida de perfís aínda indeterminados.
Eyré cualifica a súa decisión de concorrer a esta elección interna como "persoal e libérrima" e até deixa entrever que estaría disposto a retirarse da carreira se aparecer algunha outra persoa con máis opcións de éxito nas primarias. Non parece que nese sentido se estivese a referir a Lidia Senra, a candidata indixitada por Beiras. A palabra vaina ter a militancia de Anova o vindeiro domingo 30 de marzo.
