Juan Carlos I reúnese esta segunda feira en Madrid co seu fillo, o xefe de Estado, Felipe VI, logo de pasar tres días en Sanxenxo para participar no Trofeo Viaxes Interrías da Copa de España de Vela de 6 metros.
Na súa última noite no municipio galego, á entrada da casa de Pedro Campos —presidente do Club Náutico e amigo íntimo do emérito—, contestou a algunhas preguntas dunha das xornalistas alí presentes sobre ese encontro, para o que mesmo pediu a Campos que detivese o coche.
"Como que que lle vou a dicir? Ti que lle dirías ao teu fillo?", respondeu Juan Carlos I á pregunta de que pensaba dicirlle a Felipe VI esta segunda feira. Logo sinalou, aliás, que ten "moitísima" gana de velo.
A parte máis polémica das declaracións chegou cando ao emérito lle preguntaron se "vai dar explicacións". "Explicacións de que?", resolveu, antes de continuar cara ao interior da vivenda.
O monarca abandonou Sanxenxo contra as 7.40 horas desta segunda feira para dirixirse ao aeroporto de Peinador, onde voará a Madrid para reencontrarse con Felipe VI, nunha xuntanza na que tamén está prevista a presenza da raíña emérita Sofía.
Concentración de repulsa
O sábado houbo en Sanxenxo unha concentración, baixo o lema 'Galiza non ten rei', para protestar contra a presenza do emérito na vila. Marta Gómez, secretaria xeral de Galiza Nova —unha das entidades convocantes—, atendeu Nós Diario para denunciar a anomalía que supón que "o rei emérito poida pasear tan impunemente polo noso país".
Regreso o próximo mes
Por outra parte, este domingo o alcalde de Sanxenxo, Telmo Martín, confirmou que Juan Carlos I voltará á localidade en xuño para as regatas do Campionato do Mundo de Vela, e sinalou que "hai máis 'juancarlistas' do que se quere facer crer".
Polo de agora, o emérito, segundo as previsións de Casa Real, voltará esta mesma segunda feira aos Emiratos Árabes Unidos, onde estabeleceu a súa residencia, se ben xa manifestou en numerosas ocasións a súa vontade de seguir visitando o Estado español.
