A líder de Podemos, Ione Belarra, destacou este sábado que a militancia do partido na Galiza dixo "alto e claro" que a formación violeta debe estar presente nas eleccións galegas e que o seu proxecto político debe ser "respectado".
Así o proclamou nunha mensaxe na rede social X tras coñecer que as bases de Podemos Galicia rexeitaron de forma ampla, con 62,36% dos votos, concorrer en coalición con Sumar para esta cita electoral, votando así en contra do preacordo de confluencia que se alcanzou a pasada cuarta feira.
Tras esta decisión, Belarra salientou que na súa formación as decisións importantes tómaas a xente e, en consecuencia, unha "ampla maioría" de rexistrados dixo "alto e claro" que “o proxecto transformador de Podemos ten que estar presente nas próximas eleccións galegas".
A secretaria xeral da formación morada trasladou tamén o seu parabén á ex edil da Coruña Isabel Faraldo, a máis votada nas primarias internas para elixir o liderado da candidatura e resaltou que é a "mellor" cabeza de cartel.
Por último, Belarra reflexionou que esta consulta evidencia que a xente de Podemos quere o seu proxecto "sexa respectado" e está "orgullosa" do que é o partido morado, tanto polo realizado como polo futuro que ten por diante. "Somos a única organización na que non mandan os dirixentes senón a xente. Si se pode", concluíu.
62,36% das persoas rexistradas en Podemos Galicia rexeitou concorrer en coalición con Sumar para as eleccións galegas, fronte a 36,25% dos votos que si apostaba por ir xuntos aos comicios na consulta interna despregada pola formación durante as últimas dúas xornadas.