O voceiro nacional do BNG, Xavier Vence, concedeu unha entrevista ao diario El País na que abordou diversas cuestións de actualidade, entre elas as posíbeis alianzas que puidese acometer o Bloque de cara ás municipais, para as que o dirixente nacionalista dixo “non saber que vai pasar” pero asegurou que a prioridade da súa formación será “un polo nacionalista”.
Vence tamén falou das relacións con Esquerda Unida -á que se referiu como “forza minoritaria”- e mesmo da posibilidade de chegar a acordos, que parece moi afastada: “Se Izquierda Unida contribúe a unha dinámica que reforce a galeguización do debate non haberá ningún problema, pero non é así. Hai quince días tivemos unha xuntanza para falar da posibilidade de concretar unha axenda galega sobre o cambio de réxime e a abdicación do rei pero eles preferiron supeditarse ás estratexias, discurso e consignas a nivel de Estado”.
"Respecto a Podemos hai que ver que unha cousa é un discurso xenérico de dez puntos para unhas eleccións e outra un proxecto político", di Vence
![Publicidade 196050]()
Sobre a irrupción de Podemos, o líder do BNG asegurou que “naceu sen estrutura e nos seus primeiros pasos para crear unha organización empeza a tropezar cos típicos problemas. Unha cousa é un discurso xenérico con dez puntos para unhas eleccións e outra un proxecto político. Veremos o que dá de si”.
Na entrevista, Vence negou que o BNG levase tempo pechado, porén incidiu na necesidade de “mellorar a interlocución coas persoas contrarias ás políticas do PP e a troika”.
