José Ramón Gómez Besteiro lamentou que Galiza perde "moitos cartos e oportunidades económicas" polo "pouco peso político" do candidato do PP.
O candidato socialista, que interveu xunto á portavoz do PSOE, Esther Peña, a cabeza de lista de Pontevedra, Elena Espinosa, e a alcaldesa Digna Rivas, dixo que "a falta de liderado de Rueda" fai que Galiza "pague as consecuencias do PP que manda, o de Ayuso, aliada co PP de Portugal para rexeitar o AVE a Galiza e priorizar a conexión Lisboa-Madrid, ante a impasibilidade do candidato do PP galego".
"Non queremos a un Rueda calado, recibindo ordes de Madrid contra os intereses de Galiza", salientou, pregado á estratexia de Ayuso e Feixoo.
Vigo-Porto-Lisboa
Fronte a iso, Besteiro comprometeuse a "priorizar o AVE Vigo-Porto-Lisboa", que resulta "esencial para a economía" galega e para o que conta co apoio dos socialistas de Portugal. Por iso, o dirixente socialista avanzou que vai pedir "un pronunciamento expreso" de Rueda e do PP para modificar os regulamentos europeos e incorporar á liña da Rede Transnacional Europea en abril, permitindo introducir pasaxeiros e mercadorías.
Durante a súa intervención, tamén reivindicou a xestión do Goberno para "situar a AP-9 no camiño da gratuidade" e defendeu que a decisión da gratuidade "tomarase a través dun goberno durante catro anos con Pedro Sánchez á fronte, pese a quen lle pese".
Pola súa banda, a cabeza de lista por Pontevedra, Elena Espinosa, apuntou que o candidato socialista é "a persoa na que todos teñen que depositar a confianza" para "facer que o país cambie definitivamente, para unir aos concellos co goberno, sen discriminar a ninguén, como fai a Xunta dirixida polo PP".
Enquisas
Por outra parte, a cabeza de lista do PSdeG pola Coruña, Patricia Iglesias, pronunciouse este domingo sobre as enquisas publicadas nas últimas horas, como do instituto EM-Analytics para Nós Diario, para asegurar que se "constata a remontada sen reservas" dos socialistas e sinalou que "cantos máis galegos coñecen a Besteiro, mellores son a súa valoración e liderado", que cualifica de "audaz, valente e seguro".
Así, engadiu que "as calidades do candidato socialista son o trampolín que vai levar os socialistas á Presidencia da Xunta" e que demostran que "é o único partido capaz de liderar o cambio seguro na Galiza".
