O candidato do PSdeG á Xunta de Galiza, José Ramón Gómez Besteiro, comprometeuse a concluír a autovía AG-55, así como a liberar as peaxes entre A Coruña e Carballo se alcanza o Goberno galego.
O líder socialista considera esta peaxe "totalmente inxusta e discriminatoria" para os veciños de Bergantiños e da Costa da Morte. Con esta medida, o tamén deputado nacional considera que se contribúe a alcanzar unha maior equidade e igualdade entre os galegos, con independencia da zona onde vivan.
"Non pode ser que de forma completamente arbitraria unha parte da cidadanía teña que pagar por achegarse a un xulgado, a un hospital, ou ir traballar, mentres para outros o custo é cero. É unha cuestión de xustiza e solidariedade", manifestou.
O candidato socialista visitou este sábado a localidade de Cee, onde mantivo un encontro con alcaldes e representantes do partido e lembrou que a AG-55 naceu como unha vía "pública e gratuíta", que os populares "privatizaron no ano 97 coa construción do tramo entre A Laracha e Carballo", destacaron os socialistas nunha nota de prensa.
Así mesmo, Gómez Besteiro subliñou que a súa proposta de liberar peaxes suporá rebaixas de até o 75% nas peaxes da AP-53 e AP-9 cos Orzamentos de 2024, co obxectivo de "chegar á gratuidade".
Fronte a isto, Besteiro opuxo a xestión do PP, que cualificou de "nefasta". Así, ademais de esixir a Alfonso Rueda a eliminación da peaxe do tramo entre A Coruña e Carballo, o socialista asegurou que, de asumir a Presidencia, concluirá o tramo entre Baio e Berdoias e completará esta vía de alta capacidade até Cee e Fisterra.
