domingo 24/10/21
En Marea daralle "as máximas facilidades" a Podemos

Anova saúda timidamente a inclusión de Podemos en En Marea

O partido liderado por Xosé Manuel Beiras non se pronunciou a respeito da inclusión de Podemos en En Marea até pasadas 12 horas desde o anuncio realizado por Pablo Iglesias. Anova saudou timidamente nun chío a entrada da formación morada na candidatura ás galegas.

En Marea Luis Villares Beiras coordenadora
Membros da coordinadora de En Marea, entre eles, Beiras

“Porque En Marea cabemos todas, en pé de igualdade. #TodasXuntasPodemos. Benvidxs! A traballar para desaloxar a Brigada de Demolición!”. Así saudaba Anova a entrada de Podemos na Marea. Facíao máis de 12h após o anuncio de Pablo Iglesias vía Twitter. Precisamente, a raíz do anuncio de Iglesias –que tivo lugar pouco antes das 23.30h deste sábado-, comezaron a xurdir nas redes sociais todo tipo de reaccións, a maior parte delas positivas.


Horas após o anuncio chamaba a atención o silencio por parte de Anova, que non se pronunciara ao respeito nin como organización nin a través dos seus portavoces. Fronte ao entusiasmo suscitado entre a Marea Atlántica e IU, non foi até este sábado ás 12h cando o partido de Xosé Manuel Beiras lle daba a benvida a Podemos vía Twitter. A conta de Beiras en Twitter limitábase a rechiar a mensaxe lanzada por Anova.

Outras reaccións

Unha das primeiras en reaxir á noticia era Alexandra Fernández, quen apuntaba en Twitter perto das 2h da madrugada que “primou o importante: sumar unha maioría para mudar as políticas do PP e facelo dunha forma democrática e en pé de igualdade. Hai Marea!”. Antón Sánchez pronunciábase ás 8h cun “xa está. Agora a mirar para adiante. Galiza merece outro goberno. #Unhamareaparaunpais”, mentres que Martiño Noriega facía o propio pasadas as 9h, “Impulsamos un espazo de unidade popular en pé de igualdade para mudar o noso país. #HaiMarea #MedreOMar #BoDía”.

O candidato á Presidencia da Xunta da Marea, Luís Villares, reaxía dos primeiros antes de chegar a medianoite. Facíao coa seguinte reacción: “A Marea á altura da xente deste País, unida e solidaria nun proxecto de xustiza social”.

En Marea daralle as “máximas facilidades” a Podemos

Pola outra banda, antes de participar na reunión da coordinadora de En Marea, Xulio Ferreiro, membro da Marea Atlántica e alcalde da Coruña, comparecía diante da prensa para analizar a incorporación de Podemos a En Marea. Sinalou que “os tempos apremian” pero que se lles dará “as máximas facilidades” aos membros de Podemos para que participen do proceso “en pé de igualdade” e que “non haxa ningunha desvantaxe a causa dese achegamento máis tardío que o resto”.

Xulio Ferreiro destaca o papel desenvolvido por Pablo Iglesias e por Echenique

Ferreiro cualificou de “valente e xenerosa” a decisión do partido morado e referiuse de “maneira especial” a Echenique e a Iglesias.

Sobre as primarias, explicou que a coordinadora de En Marea analizará como introducir o proceso de primarias de Podemos ou como unir ambos os dous, amais de decidir de se mantén só unha candidatura á Presidencia da Xunta ou non. A este respeito na mañá do sábado coñeceuse que o ex senador José García Buitrón non concorrerá como aspirante a presidir á Xunta.

comentarios