A independencia suporíalle a Catalunya unha ganancia fiscal de máis de 11.500 millóns de euros ao ano

Arredor de 11.500 millóns de euros ao ano cifra o Consell Assesor per a la Transición Nacional que suporía a secesión de Catalunya. Os informes presentados esta semana polo órgano asesor confirman a viabilidade da independencia aínda que sinalan que, no caso do proceso contar coa oposición do goberno central, a Generalitat precisaría aportar no inicio entre 4.500 e 5.000 millóns ao mes. 

O órgano que asesora ao Govern no debate soberanista sinalou tamén que a seguridade social sería completamente viábel nun estado independente, mesmo sen o acordo co goberno de Rajoy na súa posta en marcha. O presidente do Consell Assessor per a la Transición Nacional, Pi-Sunyer expuxo durante a semana en rolda de prensa os últimos informes do órgano nos que confirmou a sustentabilidade dunha seguridade social catalá, é dicir, o pago das prestacións e mesmo das cotizacións das persoas que traballaran en Catalunya. O presidente do Consell estimou en máis de 11.000 millóns de euros os ingresos adicionais da independencia que garantirían o desenvolvemento dun sistema de prestacións públicas catalá. Confirma, polo tanto, que a seguridade social sería viábel desenvólvase o referendo con ou sen acordo do Estado.