Centos e centos de milleiros de persoas ateigron rúas e prazas de Barcelona respondendo á chamada de Ara és l`hora para este 11 de setembro e cunha mensaxe clara: Queremos decidir e queremos votar o 9 de novembro. Ao longo da Gran Via de les Corts Catalanes e a Avinguda Diagonal conformouse unha senyera humana de 11 km en forma de V. Unha maré de xente procedente de diferentes puntos dos Països Cataláns (e doutras partes do mundo: Galiza, Euskal Herria, Escocia, Irlanda...) que se dan cita en BCN unidos polo desexo de construír un novo país en base ao dereito a decidir como pobo. A Garda Urbana cifrou en 1.800.000 as persoas participantes, unha cifra que a Delegación do goberno español rebaixou a 500.000 (xa só @s anotad@s para formar a V superaban esa cifra: 560.000).
"A independencia non é o tramo final, é o punto de inicio para construírmos un novo país" dixo o actor Sergi López na lectura do manifesto
Desde primeiras horas o ambiente festivo, reivindicativo e de convivio decorreron da man. Mais é a partir das 17:14 horas (números que forman unha data emblemática en Catalunya, a da perda das súas liberdades nacionais, fin da guerra de sucesión-1714) cando a riada de xente toma forma e expresa cunha soa voz a vontade de ser un pobo.
Pola democracia, contra a imposición
Bandeiras, faixas, castellers, música, baile... a mobilización que enche Barcelona é unha festa da democracia contra a imposición. O acto comezou coa interpretación por un coro de 'Ara és l´hora', de Lluis Llach para, a continuación e como reivindicación simbólica, dar paso a unha moza de Rubí de 16 anos que depositou un voto nunha urna, reivindicando así o dereito a votar na consulta do 9N.
As rúas estaban cheas. A mensaxe era clara: '9N votarem, 9N guanyarem'. Na mobilización, centos de milleiros de persoas no que a propia organización non dubida en cualificar como a mobilización máis multitudinaria da historia europea. E os e as catalás non estaban soas. Escoceses, galegos, vascos, corsos, bretóns, irlandeses.... xente dos diferentes pobos do mundo quixeron estar este 11S en BCN para apoiar a Catalunya no seu camiño cara á liberdade.
Entre @s manifestantes, representantes das diferentes comunidades de inmigrantes que viven en Catalunya: galeg@s, paquistaníes, uruguai@s...
'We want independence'
Un xigantesto 'We want independence' (Queremos a independencia) presidía a praza principal onde decorría a mobilización, Unha mensaxe, desexo, reivindicación (a independencia) máis que presente en camisolas, faixas, crachás, gorras, consignas... Dev feito, a palabra de orde máis repetido ao longo da mobilización foi a de independencia. "A independencia non é un punto final, é o principio para construirmos un novo país" afirmou o actor Sergi López na lectura do manifesto.
Nos diferentes tramos do percorrido, pancartas xigantes cos rostos de diferentes líderes mundiais (de Merkel a Dilma, pasando por Obama) e coa mesma lexenda todos ao pé: 'Os cataláns queremos votar'.
Alén dos centos de milleiros de persoas, na marcha estiveron presentes representantes de partidos como ERC, CUP, CiU, ICv e mesmo PSC (a deputada Marina Gell), de plataformas sociais, sindicatos, colectivos culturais e mesmo o presidente do FC Barcelona.
"O futuro é noso, o presente xa o temos"
A presidenta de Òmnium Cultural, Muriel Casals, na súa intervención, destacou que nesta mobilización os e as catalás amosaron que "o futuro é noso, o prexente xa o temos", pondo o ramo cun Visca Catalunya Lliure!
De por parte, Carme Forcadell, da ANC, mostrouse contenta: "Conseguímolo. Enchemos as rúas e o 9N encheremos as urnas e votaremos independencia".
Presenza galega nunha xornada histórica
A histórica Diada que esta quinta feira se viviu en Barcelona contou con presenza galega. Unha delegación do BNG, conformada polo seu portavoz nacional Xavier Vence, Ana Miranda e Camilo Nogueirab estivo na capital catalá, tomando parte en diferentes actos, desde a V até un debate con galeg@s emigrad@s en Catalunya.
Tamén estiveron presentes na Diada representantes de Nós-Unidade Popular e do MGS, que mantiveron xuntanzas coas CUP, asistiron ao acto central da xornada (a xigantesca V humana) e posteriormente participaron na manifestación da esquerda independentista.