En 2015 o Concello de Noia inauguraba tres placas noutros tantos puntos da localidade para lembrar un suceso que descoñece grande parte da sociedade galega e tamén da propia comarca: o bombardeo da vila por un hidroavión fascista o Día da patria de 1936, o 25 de xullo.
Unha desas tres placas “desapareceu” estes días, feito que se puxo en coñecemento da Policía Local a principios de mes e que agora chegará ao pleno municipal do día 30 da man dunha moción de urxencia do BNG. Non é esta a primeira ocasión na que desaparece unha destas placas, o que xa acontecera en 2016. Finalmente, porén, a Policía anunciou esta tarde a aparición e reposición da placa.
Mais, que pasou en Noia naquel 25 de xullo? Por aquela data boa parte da Galiza xa estaba en mans dos franquistas após o seu golpe de estado mais non así esta localidade da comarca de Noia, onde se mantiña a resistencia ao fascismo.
O día 25, e segundo crónicas do tempo e que recolle o historiador Xerardo Agrafoxo, un hidroavión apareceu polo Testal para botar sobre a vila tres bombas, Afortunadamente, dúas non estouparon.
Os lugares onde caeron estes artefactos foron na avenida de Galiza, ás portas do antigo restaurante Ceboleiro; no Campo da Feira -onde había centos de persoas- a na Casa da Agra, estoupando só esta última.
Case 80 anos despois daquel feito, en 2015, o Concello inauguraba 3 placas conmemorativas para manter a memoria dun ataque que puido causar unha traxedia.
