Aprobada a declaración BIC da biblioteca de Emilia Pardo Bazán

A Galiza suma 772 bens de interese cultural (BIC), dos cales tres están en Meirás —alén da biblioteca, o pazo e as estatuas do Mestre Mateo—. No interior do edificio fican case 3.000 dos máis de 10.000 volumes que conforman a colección.
Libros de Pardo Bazán custodiados na sede da Real Academia Galega (Foto: RAG).
photo_camera Libros de Pardo Bazán custodiados na sede da Real Academia Galega (Foto: RAG).

O Goberno galego aprobou na súa reunión desta quinta feira, decorrida en Ferrol, o decreto polo que se declara ben de interese cultural (BIC) a Biblioteca de Emilia Pardo Bazán, o que supón o recoñecemento do valor cultural e a protección e salvagarda dun total de 10.855 volumes. Deles, 7.883 están custodiados na sede da Real Academia Galega e case 2.972, no interior do pazo de Meirás.

A Xunta reivindicou que resolve así este procedemento "con axilidade", dez meses antes do prazo máximo marcado pola lei, de dous anos, xa que a tramitación fora iniciada en novembro de 2020 coa incoación do expediente. Neste tempo non se recibiron alegacións e contouse con todos os informes favorábeis dos órganos asesores: a Real Academia Galega, o Consello da Cultura Galega, a Real Academia Galega de Belas Artes da Nosa Señora do Rosario e a Facultade de Filoloxía da Universidade da Coruña.

Á hora de acreditar este recoñecemento, o decreto de declaración BIC constata a "singularidade e carácter único" das pezas. Así, cualifícase como unha "colección esencial" tanto por ser unha biblioteca creada pola propia autora, entre os grandes referentes da creación e a intelectualidade da súa época, como por ser froito das súas relacións coas e cos artistas coetáneos.

Tamén se incide no "especial valor cultural" da colección, como testemuño dun período histórico, ao ser un patrimonio material que contribuiría ao coñecemento desta etapa da historia cultural da Galiza.

Tres BIC en Meirás

Con esta declaración BIC, a Galiza suma 772 BIC, dos cales 96 foron declarados desde a entrada en vigor da Lei 5/2016 do patrimonio cultural da Galiza, que facilitou a declaración e protección cun concepto máis amplo baseado tamén nas relacións territoriais e no patrimonio inmaterial.

A aprobación deste decreto supón a suma de tres bens declarados BIC en Meirás. O primeiro paso tivo lugar en 2008, coa declaración do pazo coa categoría de sitio histórico, e o segundo en 2019, coas nove estatuas da portada exterior do Pórtico da Gloria, obra do Mestre Mateo, dúas das cales están actualmente en Meirás —Abraham e Isaac—. Complétase agora coa declaración da Biblioteca de Emilia Pardo Bazán.

Negociación paralela ao proceso xudicial

Nestes momentos, a Xunta e o Goberno estatal negocian un convenio para ampliar o BIC do pazo de Meirás, co obxectivo de incluír determinados elementos do interior vinculados a Pardo Bazán e a Francisco Franco. A Xunta mantén a súa vontade de materializar esta ampliación e explica que só resta fechar o anexo dos bens aos que se dará protección, así como unificar os bens que se reclaman por vía xudicial e os de protección patrimonial. Trátase dun procedemento en paralelo co proceso xudicial en marcha para determinar a propiedade dalgún destes bens e cuxa vista está pendente de data, após aprazarse dúas veces.

Apoia Nós Diario

Se estás lendo de balde este xornal é grazas ás máis de 3.000 persoas subscritoras. A información independente ten un prezo. Apoia un xornalismo galego e sustentábel subscribíndote a Nós Diario ou facéndote mecenas.

Máis en MEMORIA E HISTORIA
comentarios