Cun delicado estado de saúde mais con ánimo para continuar coa folga de fame que iniciou hai xa 35 días. Así define o seu estado Luaty Beirão, que decidiu adoptar a decisión en protesta polo encarceramento dos activistas detidos en Luanda e polo xuízo ilegal ao que se enfrontan.
Dado o empeoramento da súa saúde, cada vez son máis as voces que lle piden a Luaty Beirão que abandone o xaxún, mais “el non cambia o pensamento, séntese tratado inxustamente”, asegurou a súa parella, quen deu conta diante dos medios da “gravidade” da situación clínica do activista.
O embaixador de Portugal en Luanda, João da Câmara, reuniuse hoxe co activista, que tamén conta con nacionalidade portuguesa, aínda que non deu declaracións á prensa após saír da clínica privada na que Luaty Beirão permanece ingresado.
O xuízo aos activistas desenvolverase, previsibelmente, entre o 16 e o 20 de novembro no Tribunal Provincial de Luanda. Os avogados veñen de alegar “detención excesiva preventiva” e a “detención ilegal” dos activistas e atópanse agora á espera do resultado do hábeas corpus.
A detención dos 15 mozos tivo lugar o 20 de xuño de 2015 acusados de preparar un golpe de estado. Outros dous foron arrestados días após e tamén seguen na cadea.