mércores 27/01/21

Palabras con memoria: no corpo...

carrafuza.- Alude aos mocos aloxados no nariz, ou máis ben aos solidificados.

Exemplo.- “Porco, non andes tocando as carrafuzas!”

Lugar de escoita.- Ferrol cidade, pero suponse un ámbito máis amplo.

Fonte.- Xoán Ignacio Taibo.

faba do mel.- Forma para denominar o nó da gorxa, noz de Adán ou mazá de Adán, que segundo Constantino García tamén chaman castaña en Portugal.

Lugar de escoita.- Trasar de Carballo.

Fonte.- Anxo González Guerra.

Outros apuntamentos.- Di a fonte que se lle adoita dicir ás meniñas e meniños: “Vouche coller/buscar a faba do mel” e fáiselles cóxegas debaixo do papo como se lles fósemos coller a noz, o nó da gorxa.

gabuxas.- Cóxegas.

Lugar de escoita.- Comarca do Barbanza.

Fonte.- Carlos Mosteiro.

pachena.- Persoa en posición de decúbito supino.

Lugar de escoita.- Ferrolterra.

Fonte.- Henrique Dacosta.

relos.- Sorte de formigo que fai que unha persoa non pare quieta, movendo espasmodicamente algunha parte do seu corpo, extremidades por exemplo.

Exemplo.- “Que che pasa que parece que tes os relos? Non paras quieto.”

Lugar de escoita.- Ferrolterra.

Fonte.- Henrique Dacosta.

sarcelos.- (Ademais de significados xa rexistrados) Mocos.

Lugar de escoita.- Parroquia de Son (Navia de Suarna).

Fonte.- ENDL Navia de Suarna.

comentarios