sábado 29.02.2020

O Dicionario da Academia incorpora léxico da Rede

O Seminario de Lexicografía da rúa Tabernas -a rúa coruñesa onde se atopa a Real Academia Galega- deu entrada no Dicionario da institución a numerosas palabras novas. Moitas delas están relacionadas coa Rede: ciberataque, ciberseguridade, blogosfera, ciberacoso ou xestor/a de comunidade, por exemplo.
 

Dicionario en liña da Real Academia Galega.
Dicionario en liña da Real Academia Galega.

Ademais, os académicos revisaron no que vai de 2018 unhas 2.200 voces do dicionarios. Entre novas entradas, novas acepcións en termos xa recollidos e mudanzas nas definicións, modificaron 350 voces. Outras palabras incorporadas neste primeiro semestre de ano foron rap, baremar ou tripi.

A propia Academia explica nun comunicado que moitas das novas voces cumpren “co obxectivo de ir acdando unha maior presenza no Dicionario do léxico relacionado coas tecnoloxías da información e a comunicación”. Neste sentido, non só aparecen novas palabras, senón que se amplían acepcións doutras. Por caso, na palabra nube, que a partir de agora tamén é “espazo virtual para o almacenamento, xestión e procesamento de datos e información aloxados en Internet a través de servidores remotos”.

Rendibilizar, colaborativo, corremundos, aparcacoches e aporofobia -“medo, aversión ou fobia aos pobres e desfavorecidos”- son outras achegas novidosas ao Dicionario. Segundo expón a institución, as vías para a ampliación do depósito de léxico son distintas. Os membros achegan propostas, pero tamén son recibidas por distintas canles procedentes de particulares e institucións.

comentarios