Jack Teixeira, de 21 anos, comparece esta sexta feira diante dun tribunal federal de Boston, nos Estados Unidos (EUA), despois de ser arrestado a quinta feira como presunto autor das filtracións da Intelixencia do país, ao difundir documentos confidenciais nos que se abordaba desde a situación límite das Forzas Armadas de Ucraína até a presenza de tropas da Organización do Tratado do Atlántico Norte (OTAN) en territorio ucraíno, revelando que Washington espía países aliados ou o secretario xeral da Organización das Nacións Unidas (ONU), o portugués António Guterres.
O voceiro do Pentágono, Patrick Rider, explicou que a filtración foi “un acto criminal deliberado”, mentres que o fiscal xeral Merrick Garland sinalou que se investiga “a suposta extracción, retención e transmisión non autorizada de información clasificada de defensa nacional”.
O detido era membro da Garda Aérea Nacional e traballaba nunha base militar en Massachusetts como especialista en sistemas de transporte cibernético, polo que tería acceso a documentos confidenciais ao estar encargado de protexer as redes de comunicación militar.
Á respecto da espionaxe a Guterres, o voceiro da Secretaría Xeral da ONU, Stéphane Dujarric, indicou que, despois de “levar bastante tempo no seu traballo”, “non está sorprendido polo feito de que haxa xente espiando e escoitando as súas conversas privadas”, ao difundirse unha charla con Amina Mohammed, vice secretaria xeral da ONU, na que defendía un esforzo para prorrogar o acordo de exportación de grans polo mar Negro incluso se iso requiría cumprir a parte do pacto referido á liberación dos obstáculos que frean as exportacións de cereais e fertilizantes rusos, o que para Washington significaba “minar” o seu traballo “para que Moscova renda contas” pola invasión de Ucraína.
Nese sentido, Dujarric apuntou que as conversas foron “distorcidas” e que Guterres fai o posíbel “para reducir o prezo dos alimentos, cereais e fertilizantes en todo o mundo”, reclamando que todos os Estados respecten a “inviolabilidade” da entidade.
Pola súa parte, a OTAN negou que case un cento de soldados de operacións especiais de varios membros estean a operar en territorio ucraíno, como desvelou un documento filtrado que detalla que se trata de soldados británicos, letóns, franceses, estadounidenses e un holandés.
Venda de armas chinesas a Rusia
Aliás, novos documentos filtrados sosteñen que a China tería decidido vender armas a Rusia, aínda que fontes do Executivo dos EUA trasladaron que non contan con probas, o que levou Beijing a reiterar que non venderán armas ás partes en conflito.
